غزہ میں تین فلسطینی ماہی گیروں کی شہادت، القسام بریگیڈ کی تحقیقات شروع
شیعیت نیوز: صیہونی حکومت کے فوجیوں نے غزہ کے جنوب میں فلسطینی ماہی گیروں کی ایک کشتی پر مارٹر گولے سے حملہ کر دیا جس کے نتیجے میں تین فلسطینی ماہی گیر شہید ہو گئے۔
المیادین ٹی وی کی رپورٹ کے مطابق غاصب صیہونی حکومت کے درندہ صفت فوجیوں نے اتوار کی صبح خان یونس کے قریب فلسطینی ماہی گیروں کی ایک کشتی کو اپنے وحشیانہ حملے کا نشانہ بنایا۔صیہونی حکومت کی بحریہ نے بارہا غزہ کے ماہی گیر فلسطینیوں کو جارحیت کا نشانہ بنایا ہے جس میں درجنوں فلسطینی شہید و زخمی ہوئے ہیں۔
صیہونی حکومت نے گزشتہ موسم گرما میں فلسطین کے مقبوضہ علاقوں سے ملنے والے غزہ کے سرحدی علاقوں میں کشیدگی بڑھنے کے بعد فلسطینی ماہی گیروں کا دانہ پانی بند کرنے کا اعلان کر دیا تھا۔
یہ ایسی حالت میں ہے کہ غزہ کا گذشتہ چودہ سالوں سے محاصرہ جاری رہنے کی وجہ سے اس علاقے میں شدید اقتصادی اور معاشی مسائل پیدا ہو گئے ہیں اور فلسطینیوں کو غذائی اشیا اور دواؤں تک کی شدید قلت کا سامنا ہے اور ہزاروں افراد ماہی گیری سے اپنی روز مرہ کی زندگی بسر کرنے پر مجبور ہو گئے ہیں۔
یہ بھی پڑھیں : گریٹر اسرائیل منصوبہ سے متعلق حقائق
دوسری جانب اسلامی مزاحمتی تحریک ’’حماس‘‘ کے عسکری ونگ عزالدین القسام بریگیڈ نے فلسطین کے علاقے غزہ کی پٹی میں سمندری حدود میں ہونے والے پراسرار دھماکے اور اس میں تین افراد کے جاں بحق ہونے کی تحقیقات شروع کر دی ہیں۔
رپورٹ کے مطابق القسام بریگیڈ کی طرف سے جاری ایک بیان میں کہا گیا ہے کہ تنظیم نے جنوبی غزہ کے علاقے خان یونس میں ہونے والے خونی دھماکے کی تحقیقات شروع کی ہیں۔
القسام بریگیڈ کی طرف سے جاری کردہ بیان میں کہا گیا ہے کہ تنظیم غزہ کی پٹی میں سیکیورٹی اداروں کے ساتھ مل کر اس واقعے کی تحقیقات کررہی ہے۔ جلد ہی اس کے نتائج جاری کردیے جائیں گے۔
القسام بریگیڈ نے حادثے میں شہید ہونےوالے تین فلسطینیوں محمد حجازی اللحام، زکریا اللحام اور یحییٰ مصطفیٰ اللحام کی شہادت پر افسوس کا اظہار کرتے ہوئے ان کے لواحقین سے یکجہتی کا اظہار کیا ہے۔
