العیسویہ اور نابلس میں فلسطینیوں کا اسرائیلی فوج سے تصادم

شیعیت نیوز: گذشتہ روز مقبوضہ بیت المقدس میں العیسویہ کے مقام پر فلسطینی شہریوں اور اسرائیلی فوج کے درمیان ہونے والے تصادم کے دوران صیہونی فوج نے نہتے فلسطینیوں کے خلاف طاقت کا استعمال کیا۔ دوسری جانب فلسطینی شہریوں نے اسرائیلی فوج پر پٹرول بم پھینکے۔
بدھ کے روز عیسویہ پر دھاوا بولنے والی اسرائیلی فوج نے فلسطینی شہریوں پر آنسوگیس کی شیلنگ اور صوتی بموں سے حملہ کیا اور ان پر اندھا دھند شیلنگ کی۔
ادھر ایک دوسری پیش رفت میں عیساویہ کالونی میں نقاب پوش فلسطینی نوجوانوں نے قومی نعروں کی چاکنگ کی۔ شہید محمد عبید کالونی میں دیواروں پر ان نعروں کی چاکنگ کو اسرائیلی فوج کی طرف سے مٹا دیا گیا تھا۔
ادھر ایک دوسرے سیاق میں العیسویہ کے فلسطینیوں نے علیان نامی فلسطینی خاندان کے مسمار مکان کے ملبے پر مکانات کی مسماری کے خلاف دھرنا بدستور جاری رکھا ہوا ہے۔ اس مکان کو گذشتہ سوموار کومسمار کردیا گیا تھا جس کے بعد فلسطینیوں نے احتجاج کے طور پر منہدم مکان کے ملبے پر دھرنا دے دیا تھا۔
یہ بھی پڑھیں : جب امریکہ عملی اقدامات اٹھائے تب ایران جوہری وعدوں کو پورا نبھائے گا، اسماعیل بقائی
دوسری جانب فلسطین کے مقبوضہ مغربی کنارے کے شمالی شہر نابلس میں بدھ کے روز دو الگ الگ مقامات پر فلسطینی شہریوں اور اسرائیلی فوج کے درمیان جھڑپیں ہوئیں جن میں متعدد فلسطینی زخمی ہوگئے۔
مقامی ذرائع کے مطابق بدھ کے روز اسرائیلی فوج اور فلسطینی شہریوں کے درمیان نابلس کے جنوبی اور مشرقی علاقے میں تصادم ہوا۔
جنوبی نابلس میں اوصرین کے مقام پر اسرائیلی فوجیوں نے فلسطینی شہریوں پر آنسوگیس کی شیلنگ کی جس کے نتیجے میں متعدد فلسطینی دم گھٹنے سے زخمی ہوگئے۔
اسرائیلی فوج نے شہر کی سڑکوں پر بھی دھاتی گولیوں سے فلسطینیوں پر آنسوگیس کی شیلنگ کی جس کے نتیجے میں رسلان عدیلی نامی شہری زخمی ہوگیا۔ بعد ازاں اسرائیلی فوج نے عدیلی کو حراست میں لے لیا۔
ادھر مشرقی بیت المقدس میں شاہراہ عمان اور عسکر کے مقامات پر فلسطینی شہریوں پر آنسوگیس کی شیلنگ اور دھاتی گولیوں سے حملہ کیا۔