کویت کی پارلیمنٹ کا اسرائیل کے ساتھ تعلقات قائم کرنے سے انکار
شیعیت نیوز: کویت کی پارلیمنٹ نے ایک بار پھراسرائیل کے ساتھ کسی طرح کے تعلقات قائم کرنے کی مخالفت پر مبنی اپنے ملک کے پائدار موقف کا اعادہ کیا ہے۔
العھد ویب سائٹ کی رپورٹ کے مطابق کویت کی پارلیمنٹ کے اسپیکر مرزوق الغانم نے فلسطین کی تحریک فتح کی مرکزی کمیٹی کے سیکریٹری جبرئیل رجوف سے ملاقات میں کہا کہ ان کا ملک فلسطین کی حمایت کا سلسلہ جاری رکھے گا اور اسرائیل کے ساتھ تعلقات برقرار کرنے کے مرحلے میں داخل نہیں ہوگا۔
کویت کی پارلیمنٹ کے اسپیکر نے اجلاس کے دوران زور دیاکہ ہم فلسطین کی حمایت جاری رکھے ہوئے ہیں اور سمجھتے ہیں کہ فلسطینی زمینوں پر قبضہ ختم ہونا ضروری ہے۔
یہ بھی پڑھیں : ٹرمپ آج کے بعد دشمنوں سے خوفزدہ ہو کر زندگی گزارے گا، زینب سلیمانی
مرزوق الغانم نے اس بات پر زور دیتے ہوئے کہ فلسطینیوں کی زمینوں پر غاصبانہ قبضہ ختم ہونا چاہئے کہا کہ کویت فلسطین میں قومی اتحاد اور پارلیمانی صدارتی انتخابات کے انعقاد کا خیرمقدم کرتا ہے۔
انہوں نے یہ بھی کہا کہ کویت فلسطین میں قومی اتحاد اور قومی مفاہمت کا خیرمقدم کرتا ہے،الغانم نے یہ بھی بتایا کہ اسرائیل کے ساتھ تعلقات کو معمول پر لانے کی مخالفت کرنے پر کویت کا مؤقف مستحکم ہے، ہم تل ابیب کے ساتھ تعلقات معمول پر لانے کے مرحلے میں داخل نہیں ہوں گے، ہم پہلے ہی اس سلسلے میں اپنا مؤقف بیان کر چکے ہیں۔
اس سے قبل حکومت کویت نے بھی صیہونی حکومت کے ساتھ تعلقات بحال نہ کرنے کے سلسلے میں اپنے ملک کے پائیدار موقف کا اعادہ کیا تھا۔
واضح رہے کہ صیہونی حکومت کے ساتھ عرب ممالک کے تعلقات قائم کرنے کے لئے امریکی صدر ٹرمپ کے دباؤ کے نتیجے میں اب تک چار عرب ممالک امارات، بحرین، سوڈان اور مراکش اسرائیل کے ساتھ اپنے سفارتی تعلقات پوری طرح برقرار کر چکے ہیں۔
