کربلا عاشقوں کی وادی ہے اور کربلا ہدف زندگی گزار کر بقا پانے والوں کی پیام گاہ ہے،علامہ شہنشاہ نقوی
اگر معرفت کی نظروں سے دیکھا جائے، تو زمین سے آسمان تک غم حسینؑ کی فضا نظر آتی ہے اور ایام عزاء سید الشہدا ؑ میں صبر و تحمل، برداشت اور دین الٰہی کا تذکرہ ہے
شیعت نیوز: معروف عالم دین اور خطیب اہل بیتؑ علامہ شہنشاہ حسین نقوی نے کہا ہے کہ آج محرم کی آمد ہے اور اگر معرفت کی نظروں سے دیکھا جائے، تو زمین سے آسمان تک غم حسینؑ کی فضا نظر آتی ہے اور ایام عزاء سید الشہدا ؑ میں صبر و تحمل، برداشت اور دین الٰہی کا تذکرہ ہے، کربلا عاشقوں کی وادی ہے اور کربلا ہدف زندگی گزار کر بقا پانے والوں کی پیام گاہ ہے۔
پاک محرم ایسوسی ایشن کے تحت نشتر پارک کراچی میں منعقدہ عشرہ محرم کی مجلس سے افضلیت حضرت امام علیؑ کے عنوان سے خطاب کرتے ہوئے علامہ شہنشاہ نقوی نے کہا کہ کربلا کے میدان میں امام حسینؑ نے یہی پیغام دیا کہ اللہ سے محبت اور دین محمدؐ کی پیروی کرتے رہنا اور یہی پیغام حضرت امام علیؑ کے پیغامات کا تسلسل ہے۔
یہ بھی پڑھیں: محرم الحرام میں امن و محبت کے فروغ کیلئے کام کیا جائے، علامہ شہنشاہ نقوی
انہوں نے کہا کہ حضرت امام علیؑ کی سب سے بڑی فضیلت یہ ہے کہ آپؑ کو ازروئے قرآن اللہ نے اپنے ساتھ گواہ رسولﷺ بنایا، قرآن کریم نے آپؑ کو نفس رسولﷺ قرار دیا اور آپکی اور آپکی اولاد کی محبت کو فرض قرار دیکر یہ پیغام دیا گیا کہ ان سے وابستہ رہ کر انسان اپنی دنیا و آخرت و سنوار سکتا ہے اور کامیابی کے ساتھ ساتھ کامرانی اور فلاح کا راستہ تلاش کرسکتا ہے۔
