آئی ایس او پاکستان نے ملک میں یکساں نظام تعلیم کے نفاذ کا مطالبہ کر دیا

شیعیت نیوز: لاہور کی مختلف یونیورسٹیز کے طلباء سے خطاب کرتے ہوئے امامیہ اسٹوڈنٹس آرگنائزیشن پاکستان کے مرکزی صدر قاسم شمسی کا کہنا تھا کہ حکومت اپنے وعدوں پر عملدرآمد کرتے ہوئے ملک میں یکساں نظام تعلیم کو فوری نافذ العمل کرے، اگر ملک میں یکساں نظام تعلیم رائج ہوگیا تو طبقاتی نظام تعلیم کا خاتمہ ممکن ہوگا اور طلبا و طالبات میں پایا جانیوالا تعلیمی احساس محرومی بھی نہیں رہے گا۔ قاسم شمسی کا مزید کہنا تھا کہ آئی ایس او پاکستان ہمیشہ طلباء کے تعلیمی مسائل کے حل کیلئے پیش پیش رہی ہے، اسی لئے تعلیم و تربیت آئی ایس او کی اولین ترجیع بھی رہی ہے۔ متحدہ طلباء محاذ ہو یا کوئی پلیٹ فارم، ہم نے ہمیشہ طلباء کے مسائل حل کرنے کا مطالبہ کیا۔ مرکزی صدر کا کہنا تھا کہ بدقسمتی سے طلباء کو اپنے حقیقی مسائل سے آگاہی ہی نہیں، انہیں جامعات میں دوسرے مسائل میں الجھا کر رکھ دیا ہے، ضرورت اس امر کی ہے کہ تمام طلبہ تنظیمیں مسائل کے حل کیلئے یکجا ہو جائیں۔

سید قاسم شمسی کا کہنا تھا کہ نظامِ تعلیم کو تبدیل کرنے کی اشد ضرورت ہے، ہمیں ایک ایسے نظامِ تعلیم کی ضرورت ہے، جس میں اسلامی متون کے اندر اجتہاد کرکے ایک مکمل نظامِ تعلیم کی بنیاد ڈالی جائے، تاکہ ہمارے طالبعلم، دینِ اسلام کو ایک فطری اور معقول دین سمجھ کر قبول کریں اور مال و مفاد نیز پیسے کی دوڑ میں لگنے کے بجائے علم اور ٹیکنالوجی کے ذریعے سے مظلوم انسانیت، مٹتی ہوئی عدالت، دم توڑتے ہوئے انصاف اور مضطرب سماج کی خدمت کرسکیں۔ انہوں نے ایک سوال کے جواب میں کہا کہ بدقسمتی سے طلبہ یونیورسٹی سے وابستہ ہوتے ہی حقیقی تعلیم سے محروم ہو جاتے ہیں اور یہ تعلیم قائدانہ صلاحیتوں سے محروم ایک غافل انسان بنا رہی ہے، ہمیں ایسے تعلیمی نظام کی ضرورت ہے، جو اچھائی میں اضافے اور برائی کے خاتمے میں کردار ادا کرسکے، تعلیم کا نظام آفاقی ہو، جس میں مغربی دنیا کی دلچسپی اور مشرقی افکار بھی شامل ہو، الہیٰ انسان کی خصوصیات پر مشمل ہو، جس کیلئے ہمیں عملی اقدامات کرنے ہوں گے۔