لشکر جھنگوی کے دہشتگردوں کا نام تبدیل کرکے نئے شناختی کارڈز کے ذریعے مذموم کارروائیوں کا انکشاف
کالعدم تنظیموں کے کارندوں نے اخباروں میں اشتہارات دے کر نام تبدیل کر واکے وارداتیں کرنے اور سکیورٹی اداروں کوچقمہ دینے کا خوفناک طریقہ اپنا لیا ہے۔ نجی ٹی وی دنیا نیوز کے مطابق دہشتگردوں نے اپنی بھیانک وارداتوں کیلئے نیا طریقہ ڈھونڈ لیا ہے۔ دہشتگرد اخبارات میں نام تبدیل کرنے کا اشتہار دیکر نیا شناختی کارڈ بنواتے ہیں اور اپنی مذموم کارروائیاں جاری رکھتے ہیں۔ کالعدم لشکر جھنگوی سندھ کے امیر عطاالرحمان عرف نعیم بخاری نے قانون نافذ کرنے والے اداروں سے بچنے کے لیے یہی طریقہ اپنایا اور 12 اکتوبر 2014 کو اخبار میں تبدیلی نام کا اشتہار دیا اور 6 نومبر کو نادرا سے با آسانی نیا شناختی کارڈ حاصل کر کے با آسانی کراچی آتا جاتا رہا تاہم اس کی ایک معمولی غلطی نے اسے سکیورٹی اداروں کو دھوکہ دینے میں ناکام کردیا۔ ہوا کچھ یوں کہ اشتہار میں عطالرحمان بخاری نے نام تبدیل کر کے غلام محمد ولد فقیر محمد درج کرایاتاہم اس کا شناختی کارڈ نمبر یکساں رہا جس پر قانون نافذ کرنے والے اداروں نے اسے گرفتار کرلیا۔ واضح رہے کہ عطا الرحمان عرف نعیم بخاری ایس ایس پی چوہدری اسلم، جسٹس مقبول باقر پر بم حملوں سمیت تخریب کاری کی مختلف وارداتوں کا ماسٹر مائنڈ تھا اور اس کی گرفتاری پر 2 کروڑ روپے کا انعام مقرر تھا اور نام تبدیل کرنے کے باوجود قانون نافذ کرنے والے اداروں کو دھوکا دینے میں ناکام رہا اور اسے فروری 2016 میں گرفتار کر لیا گیا
