امارتی وزیر کی دھمکی پاکستانی قوم و فوج کی ہتک اور توہین ہے،وزیر داخلہ

وزیرداخلہ چوہدری نثار علی خان نے متحدہ عرب امارات کے خارجہ امور کے وزیرکی جانب سے دھمکی آمیز بیان پر رد عمل ظاہر کرتے ہوئے کہا ہے کہ اماراتی وزیر کی دھمکیاں ستم ظریفی ہی نہیں بلکہ پاکستانی قوم کے لئے لمحہ فکریہ ہے امارات کے وزیر کا بیان پاکستانی قوم ، حکومت اور فوج کی توہین پر مبنی ہے۔

اطلاعات کے مطابق وفاقی وزیرداخلہ کا کہنا تھا کہ پاکستانی قوم غیرت مند قوم ہے اور سعودی عرب کے ساتھ یو اے ای کے عوام کے لئے بھی برادرانہ جذبات رکھتے ہیں تاہم اماراتی وزیر دھمکیاں دے رہا ہے جو پاکستانی قوم، فوج اور حکومت کی ہتک، توہین اور ناقابل قبول ہونے کے ساتھ لمحہ فکریہ بھی ہے۔ انہوں نے کہا کہ اماراتی وزیر کی دھمکیاں سفارتی اداب کے منافی ہیں اور پاکستان اس قسم کی کسی دھمکی کو قبول نہیں کرے گا۔واضح رہے کہ متحدہ عرب امارات کے خارجہ امور کے ریاستی وزیر ڈاکٹر انور محمود قرقاش نے پاکستان کو دھمکی دی تھی کہ یمن کی صورتحال پر پاکستان کے مبہم بیان پر اسے بھاری قیمت ادا کرنا پڑے گی۔