طالبان دہشت گردوں کی سرپرستی کرنیوالوں کا بھی محاسبہ ہونا چاہیئے، علامہ حسن صلاح الدین

مجلس وحدت مسلمین کی شوریٰ عالی کے سربراہ اور ہیئت آئمہ مساجد و علماء امامیہ کے صدر علامہ شیخ محمد حسن صلاح الدین نجفی نے کہا کہ سانحہ پشاور کی جتنی مذمت کی جائے کم ہے، ایسے عناصر جو اس قسم کی کاروائی میں ملوث ہیں وہ مسلمان تو کیا انسان کھلانے کہ بھی حق دار نہیں۔ جعفر طیار سوسائٹی ملیر میں منعقدہ احتجاجی اجتماع سے خطاب کے دوران انہوں نے کہا کہ جو عناصر اس قسم کے واقعات کی حمایت کررہے ہیں، وہ بھی قومی مجرم ہیں ایسے عناصر سے رعایت نہ برتی جائے اور سخت ترین کاروائی کرکے انہیں کیفر کردار تک پہنچایا جائے۔

اس موقع پر مولانا نعیم الحسن الحسینی، قاری غلام قاسم، ڈاکٹر عقیل موسیٰ، مولانا محمد حسین رئیسی، مولانا باقر عباس زیدی اور دیگر نے بھی خطاب کیا اور کہا کہ اب ظلم کی حد ہوچکی ہے اور دہشت گردوں سے تمام حدوں کو پار کرلیا ہے لہٰذا اب حکمرانوں کو دہشت گردوں کے خلاف ایکشن لیتے ہوئے ان کو پھانسی پر چڑھانا ہوگا کیونکہ ان درندہ صفت حیوانوں نے پورے ملک میں خاک و خون کا بازار گرم کر رکھا ہے اور عوام، سیکیورٹی فورسز اور مذہبی مقامات ان کے نشانے پر ہیں۔