مٹھی بھر صیہونیوں کے ہاتھوں مسلمانوں کے قتل عام کے ذمہ دار عرب حکمران ہیں، اطہر عمران

امامیہ اسٹوڈنٹس آرگنائزیشن پاکستان کی مرکزی صدر اطہر عمران طاہر نے کہا ہے کہ مٹھی بھر صیہونیوں کے ہاتھوں مسلمانوں کے قتل عام کے ذمہ دار عرب ممالک کے خائن سربراہان ہیں، مظلوم فلسطینیوں پر ظلم کی قیامت ڈھائی جا رہی ہے جبکہ عرب ممالک کے خائن سربراہان کا اسرائیل کے خلاف اپنی صلاحیت و وسائل کا استعمال نہ کرنا ایک سوالیہ نشان ہے۔ لاہور میں کارکنوں کے وفد سے گفتگو کرتے ہوئے انہوں نے کہا کہ دنیائے اسلام میں تمام فتنہ پرور گروہوں کی سرپرستی امریکہ و اسرائیل کرتے ہیں جبکہ عرب ممالک انکے گماشتوں کا کردار نبھا رہے ہیں۔ اطہر عمران نے کہا کہ رہبر عظیم الشان آیت اللہ سید علی خامنہ ای نے بھی فرمایا ہے کہ جتنی قوت شام کی حکومت کو گرانے کیلئے عرب ممالک نے لگائی، اگر اتنی قوت اسرائیل کے خلاف لگاتے تو آج اسرائیل نابود ہوچکا ہوتا، القاعدہ، داعش، النصرہ اور شام کی جیش الحر کا مظلوم فلسطینوں کی مدد کو نہ پہنچنا یہ ثابت کرتا ہے کہ یہ تکفیری طاقتیں گریٹر اسرائیل کا حصہ ہیں۔ انہوں نے مزید کہا کہ مظلوم فلسطینیوں پر غاصب اسرائیل کے وحشیانہ حملوں پر عالمی میڈیا کی مجرمانہ خاموشی قابل مذمت ہے۔