گلگت: عوامی ایکشن کمیٹی کے رہنماؤں کی وفاقی حکومت کے عہدیداروں سے ملاقات، گندم سبسڈی سمیت دیگر معاملات پر مذاکرات

گلگت بلتستان میں گذشتہ گیارہ روز سے جاری احتجاجی دھرنوں کے نتیجے میں وفاقی حکومت کے ایک اعلیٰ سطحی وفد نے عوامی ایکشن کمیٹی اور مجلس وحدت مسلمین کے رہنماؤں کے ساتھ مذاکرات کامیاب ہو گئے ہیں اور ذرائع کا کہنا ہے کہ وفاقی کمیٹی نے گلگت اور بلتستان کے عوام کی جانب سے کئے جانے والے جائز مطالبات کوتسلیم کر لیا ہے اور یقین دہانی کروائی ہے کہ گندم سبسڈی بحال کئے جانے سمیت گلگت اور بلتستان میں بجلی لوڈ شیڈنگ سمیت دیگر انسانی بنیادی حقوق کی فراہمی میں موجود رکاوٹوں کو جلد دور کر لیا جائے گا۔
مذاکرات میں وفاقی حکومت کے وفد کی کمیٹی کی سربراہی وفاقی وزیر برجیس طاہر کر رہے تھے جبکہ اس موقع پر صوبائی رکن قانو ن ساز اسمبلی مرزا حسین اور سیخ ناصر بھی موجود تھے۔
رپورٹ کے مطابق مذاکرات میں اس بات کی یقین دہانی کروائی گئی ہے کہ گندم سبسڈی بحال کر کے آٹے کی فی کلو قیمت گیارہ روپے مقرر کر دی جائے گی جو ماضی میں سبسڈی ختم کئے جانے سے قبل تھی۔
مذاکرات میں موجود عوامی ایکشن کمیٹی اور مجلس وحدت مسلمین کے رہنماؤں نے بتایا ہے کہ وفاقی وزیر نرجیس طاہر نے یقین دہانی کروائی ہے کہ گندم سبسڈی کو بحال کر دیا جائے گا اورا س حوالے سے پوری رپورٹ وزیر اعظم کو بھیج دی گئی ہے جبکہ وزیر اعظم کی جانب سے رپورٹ پر دستخط کا انتظار کیا جا رہا ہے تاہم دستخط ہونے کے فوراً بعد ہی گندم سبسڈی کی بحالی کا نوٹیفکیشن جاری کر دیا جائے گا۔
دوسری جانب گلگت اوت بلتستان میں احتجاجی دھرنوں کا سلسلہ تاحال جاری ہے اور عوامی ایکشن کمیٹی اور مجلس وحدت مسلمین پاکستان کے رہنماؤں کاکہنا ہے کہ نوٹیفکیشن کے جاری کئے جانے تک احتجاج جاری رہے گا۔