سیاسی جماعتیں اور رہنما دہشت گرد اور کالعدم تنظیموں کی حمایت کر رہے ہیں
سانحہ عاشورا اور چہلم امام حسین علیہاسلام کے موقع پر ہونے والے بم دھماکوں اور میلادالنبی کے اجتماعات پر ہونے والی دہشت گردی میں ملوث دہشت گردوں کی عدم گرفتاری کے خلاف مجلسِ وحدت المسلمین کی جانب سے سندھ بھر میں جمعہ کو یوم احتجاج منایا گیا۔ اس سلسلے میں سندھ بھر احتجاجی اجتماعات اور مظاہرے ہوئے جس سے خطاب کرتے ہوئے علماءِ و مقر رین نے ان سانحوں میں ملوث مجرمان اور انکے سرپرستوں کی فیالفور گرفتاری کا مطالبہ کیا۔
شیعت نیوزکے نمائندے کے مطابق اس سلسلے میں مرکزی احتجاجی جلسہ جامع مسجد نور ایمان ناظم آباد میں منعقد ہوا جس سے خطاب کے دوران علامہ حسن ظفر نقوی نے کہا کہ محرم میں عاشورہ اور چہلم اور میلاد النبی کے جلوسوں پر حملے کرنے والے ملزمان آزاد ہیں اور شریف شہریوں کو پابند سلاسل کیا جا رہا ہے جو کہ ظلم کے سوا کچھ نہیں۔ انہوں نے کس جماعت یا تنظیم کا نام لئے بغیر کہا کہ اس وقت بعض سیاسی جماعتیں اور رہنما دہشت گرد اور کالعدم تنظیموں کی کھلم کھلا حمایت کر رہے ہیں۔ حکومت کالعدم جماعتوں اور ان کے حمایت یافتگان کے گرد گھیرا تنگ کرے۔ اس موقع پر علامہ مرزا یوسف حسین نے کہا کہ خودکش حملہ آور ملک کے کھلے دشمن ہیں، ان کا اسلام سے کوئی تعلق نہیں۔انہوں نے کہا کہ پنجاب میں دہشت گردوں کے بڑھتے ہوئے اثرورسوخ سے پاکستان میں بسنے والے عوام پریشان ہیں۔واضح رہے کہ دہشت گردی کے واقعات کی روکھتام کے حوالے سے حکومتی اقدامات پر عوامی اور مذہبی حلقوں کی جانب سے مسلسل تنقید کی جارہی ہے ۔