عراق
عراق میں دینی اقلّیتوں کے تحفظ کی ضرورت ہے
عراق کے لئے دنیائے کیتھولک کے رہنما کے خصوصی ایلچی نے اس ملک میں دہشتگرد گروہ داعش کے حملوں کے مقابلے میں دینی اقلیتوں کے دفاع کی ضرورت پر تاکید کی ہے۔ ایسوشیئیٹڈ پریس کی رپورٹ کے مطابق عراق کے لئے دنیائے کیتھولک کے رہنما پوپ فرانسس کے خصوصی ایلچی فرنانڈو فیلونی نے دہشتگرد گروہ داعش کی جانب سے دینی اقلیتوں کو نشانہ بنانے کی طرف اشارہ کرتے ہوئے کہا کہ ان دینی اقلیتوں سے تعلق رکھنے والے گھرانوں کی اپنے گھروں کی طرف واپسی کے لئے عالمی حمایت، ضروری ہے۔ فیلونی نے مزید کہا کہ عراق کے کردستان کے علاقے اور بغداد کی مرکزی حکومت کو دہشتگرد گروہ داعش کے اخراج کے لئے، اقوام متحدہ اور دیگر عالمی اداروں کے تعاون کی ضرورت ہے۔ واضح رہے کہ پوپ کے خصوصی ایلچی عراق کے عیسائیوں اورایزدیوں کی صورت حال کا جائزہ لینے کیلئے جمعرات کو عراق پہنچےہیں۔