شام کا بحران، سعودی شاہی ٹولے کو لے ڈوبے گا
عراق کے وزیر اعظم نوری المالکی نے کہا ہے کہ شام کا بحران سعودی عرب کی شاہی حکومت کو لے ڈوبے گا۔ عراق کے وزیر اعظم نے جرمنی کے ہفتہ وار جریدے اشپیگل سے بات کرتے ہوئے کہا کہ شام میں جنگ اس لئے ختم نہیں ہو رہی ہے کہ سعودی عرب کی حکومت بشار اسد کے مسلح مخالفین کی کھل کر حمایت کررہی ہے۔ ان کا کہنا تھا کہ بحران شام کے جاری رہنے کا نتیجہ، آل سعود حکومت کے خاتمے کی شکل میں برآمد ہوگا۔ عراقی وزیر اعظم نے امریکا اور آل سعود خاندان کو بحران شام کے جاری رہنے کا اصل ذمہ دار قرار دیا اور تاکید کی کہ ان ملکوں کی سازش شام میں ناکام ہو گئی ہیں اور واشنگٹن و ریاض کو دہشتگردوں کی حمایت کی اپنی پالیسی کو ختم کردینا چاہئے۔ انہوں نے مزید کہا کہ اگر امریکا اور سعودی عرب دہشتگردوں کی حمایت چھوڑ دیں تو شامی مذاکرات کی میز پر آکر اپنے مسائل خود حل کر لیں گے اور اگر یہ صورتحال اسی طرح جاری رہی تو بحران شام پورے علاقے کو اپنی لپیٹ میں لے لے گا۔ انہوں نے اپنے ملک میں دھماکوں اور خونی چھڑپوں کی جانب اشارہ کرتے ہوئے کہا کہ ان جھڑپوں کا تعلق سیاسی مسائل سے ہے۔