مری آباد میں مسجدِ خیر النساء (س) کا قیام، علاقے میں عبادت اور قرآنی تعلیم کی دیرینہ ضرورت پوری

شیعیت نیوز : صوبہ سندھ کے ضلع نوشہرو فیروز کے گاؤں مری آباد میں ایک عظیم دینی و سماجی مرکز ’مسجدِ خیر النساء (س)‘ کا قیام عمل میں لایا گیا ہے۔ اس مسجد کی تعمیر کے بعد گاؤں میں پہلی مرتبہ اہلِ علاقہ کو باجماعت نماز کی ادائیگی اور بچوں کو قرآنِ کریم کی تعلیم کے لیے ایک مستقل اور مناسب جگہ میسر آگئی ہے، جس سے علاقے کے باشندوں کی ایک دیرینہ ضرورت پوری ہو گئی ہے۔

مری آباد میں اس سے قبل کوئی مستقل مسجد موجود نہیں تھی، جس کے باعث مقامی افراد کو عبادات اور دیگر دینی سرگرمیوں میں مشکلات کا سامنا تھا۔ اسی طرح بچوں کے لیے قرآنِ کریم کی تعلیم کا بھی کوئی مستقل مرکز نہیں تھا اور انہیں مختلف اسکولوں یا کمیونٹی کی جگہوں پر تعلیم حاصل کرنا پڑتی تھی۔ اسی اہم ضرورت کو محسوس کرتے ہوئے تقریباً چار ماہ قبل اس مسجد کا سنگِ بنیاد رکھا گیا تھا جو اب مکمل ہو کر باقاعدہ طور پر اپنی خدمات انجام دے رہی ہے۔

یہ بھی پڑھیں : علامہ محمد جمعہ اسدیؒ حقیقی معنوں میں دین و ملت کے خادم تھے، تعزیتی ریفرنس سے علماء کا خطاب

یہ خوبصورت مسجد القائم سپورٹ نیٹ ورک (AQM پاکستان) کی ٹیم کی نگرانی اور کوششوں سے تعمیر کی گئی ہے۔ مسجدِ خیر النساء (س) کا قیام AQM پاکستان کے بانی ڈاکٹر منور حسن کے خصوصی تعاون سے عمل میں آیا ہے، جنہوں نے اسے اپنی مرحومہ والدہ کے نام سے صدقۂ جاریہ کے طور پر وقف کیا ہے۔ مسجد میں 150 سے زائد نمازیوں کی گنجائش ہے، جبکہ وسیع صحن، باغیچہ، بڑا وضو خانہ، ماربل اور ٹائل ورک سمیت زیرِ زمین بجلی کے انتظام کے ساتھ مکمل سولر سسٹم بھی نصب کیا گیا ہے تاکہ بجلی کی بندش میں بھی عبادات کا سلسلہ جاری رہے۔

مسجد کے قیام کے بعد علاقے میں دینی سرگرمیوں کا باقاعدہ آغاز ہو گیا ہے، جہاں روزانہ بڑی تعداد میں مقامی افراد نماز کے لیے جمع ہوتے ہیں اور بچوں کی قرآنی تعلیم کے لیے بھی ایک پُرامن جگہ میسر آ گئی ہے۔ یہ مسجد محض ایک عمارت نہیں بلکہ اس علاقے کی مذہبی اور سماجی زندگی کے لیے ایک ایسا مستقل مرکز بن گئی ہے، جو پوری کمیونٹی کی دینی و روحانی زندگی میں ایک نئے باب کے آغاز کی عملی اور روشن مثال ہے۔