صہیونی حملہ: جنرل حسین سلامی، جنرل غلام علی رشید اور ایرانی سائنسدان شہید

شیعیت نیوز : صہیونی حکومت کے فضائی حملے میں سپاہ پاسداران انقلاب کے سربراہ جنرل حسین سلامی سمیت کئی اعلیٰ فوجی افسران اور جوہری سائنسدان شہید ہوگئے ہیں۔

شہید ہونے والوں میں میجر جنرل حسین سلامی کے علاوہ خاتم الانبیاء ہیڈکوارٹر کے سربراہ میجر جنرل غلام علی رشید، ڈاکٹر طہرانچی اور ڈاکٹر فریدون عباسی شامل ہیں۔

سردار غلام علی رشید صہیونی حکومت کے حملے میں شہید ہو گئے۔ جنرل غلام علی رشید، جو کہ قرارگاہ مرکزی خاتم الانبیاء (ص) کے کمانڈر تھے، چند گھنٹے قبل سپاہ پاسداران کے جنرل اسٹاف کے ہیڈکوارٹر پر صہیونی حکومت کے حملے میں شہید ہوئے۔

صہیونی حکومت نے ایران کے مختلف علاقوں میں فوجی اور جوہری مراکز پر فضائی حملہ کیا ہے۔

تفصیلات کے مطابق صہیونی حکومت کے حملے میں سپاہ پاسداران انقلاب کے سربراہ میجر جنرل حسین سلامی شہید ہوگئے ہیں۔ دوسری جانب صہیونی فوجی ترجمان نے ایران کے مختلف مقامات پر فوجی اور ایٹمی مراکز کو نشانہ بنانے کا دعویٰ کیا ہے۔

تہران کے فرحزادی اسٹریٹ سے پہلی میدانی رپورٹ موصول ہوئی ہے، جو ان علاقوں میں شامل ہے جنہیں صہیونی حکومت کے حملے میں نشانہ بنایا گیا ہے۔

یہ بھی پڑھیں : رہبر انقلاب اسلامی کا اسرائیل کو سخت جواب: ایک تاریخی اور تلخ انجام اس کا منتظر ہے

امام خمینی ایئرپورٹ سے تمام پروازیں معطل کر دی گئی ہیں۔

صہیونی حکومت کو دندان شکن جواب دیا جائے گا۔ ایرانی پارلیمانی کمیشن برائے قومی سلامتی و خارجہ پالیسی کے سربراہ ابراہیم عزیزی نے کہا ہے کہ ایرانی عوام مطمئن رہیں، صہیونی حکومت کو اپنی غلطی کا خمیازہ بھگتنا پڑے گا۔

انہوں نے مزید کہا کہ صہیونی حملوں کے بعد تفصیلات کے لئے صرف معتبر ذرائع اور رسمی خبروں پر اعتبار کریں تاکہ کسی قسم کی افراتفری نہ پھیلے۔ عوام اس نازک مرحلے پر صہیونی حکومت کی افواہوں اور بے بنیاد خبروں سے متاثر نہ ہوں۔