عزاداری سید الشہداء پر کوئی سمجھوتہ قابل قبول نہیں، علامہ سید علی اکبر کاظمی

شیعیت نیوز: مجلس وحدت مسلمین پاکستان صوبہ پنجاب کے سیکرٹریٹ لاہور میں بانیاں عشرہ اور ماتمی سنگتوں کے سالاروں نے "شیعہ بیٹھک” کے عنوان سے اہم اجلاس میں بھرپور شرکت کی۔

اجلاس کے شرکاء سے خطاب کرتے ہوئے صوبائی صدر پنجاب علامہ سید علی اکبر کاظمی نے کہا کہ ہم کسی صورت عزاداری سید الشہداء امام مظلوم کربلاؑ پر سمجھوتہ قبول نہیں کریں گے۔

انہوں نے کہا کہ جس طرح مچھلی پانی کے بغیر زندہ نہیں رہ سکتی، ہم عزاداری سید الشہداء امام مظلوم کربلا کے بغیر زندہ نہیں رہ سکتے۔ مجلس وحدت مسلمین پاکستان نے اپنی ابتداء سے لے کر آج تک ہمیشہ مومنین، زائرین اور عزاداروں کی خدمت کی ہے۔

یہ بھی پڑھیں: این ڈی ایم اے کی جانب سے فلسطین، لبنان اور شام کے جنگ زدہ عوام کے لیے امدادی سامان روانہ

انہوں نے مزید کہا کہ ہم نے ہمیشہ فروغ عزاداری اور تحفظ عزاداری کے لیے اپنا بہترین کردار ادا کیا اور دشمن کی ہر سازش کو بے نقاب اور ناکام بناتے ہوئے عزاداری کے قیام کو 100 فیصد یقینی بنایا اور وقت کے یزید کے خلاف قیام کیا۔

علامہ سید علی اکبر کاظمی کا کہنا تھا کہ ہم عزاداروں کے نوکر اور ماتمیوں کے جوتے اٹھانے والے ہیں۔ ہم عزاداروں اور عزاداری کے تحفظ کے لیے ہر قربانی دینے کے لیے تیار ہیں۔

انہوں نے مزید کہا کہ مولا علیؑ کے ماننے والے ہمیشہ منظم ہوتے ہیں، اور ہمیں بھی منظم ہونا پڑے گا تاکہ دشمن کو ہر سطح پر ناکام کیا جا سکے۔ ہمارا مقصد معاشرے میں عدل و انصاف کی حکومت قائم کرنا ہے اور کسی صورت دشمن کو کامیاب نہیں ہونے دیں گے۔

انہوں نے کہا کہ ہماری قیادت سینیٹ میں بھی قوم و ملت جعفریہ کی آواز بن کر ہر مطالبہ پیش کر رہی ہے اور اپنا فرض ادا کر رہی ہے۔ ہمیں سب کو مل کر ہر سیاسی میدان میں کامیابی حاصل کرنا ہو گی، جو آپ کے اتحاد کے بغیر ممکن نہیں۔ ان شاء اللہ، ہم کسی دباؤ اور سازش کو قبول نہیں کریں گے اور آپ کے اعتماد پر پورا اتریں گے۔