قافلے پر حملہ امن معاہدے کو سبوتاژ کرنے کی مذموم حرکت: پاکستانی وزیراعظم

شیعیت نیوز: اسلام آباد میں وفاقی کابینہ کے اجلاس میں پاکستان کے وزیراعظم شہباز شریف نے کرم میں ہونے والے حملے کی مذمت کرتے ہوئے کہا کہ امن معاہدے کو سبوتاژ کرنے کے لیے شرپسندوں کی یہ ایک مذموم حرکت تھی۔ انہوں نے مزید کہا کہ ڈپٹی کمشنر کا پشاور میں علاج جاری ہے۔

پارا چنار-ٹل مین شاہراہ ہر قسم کی آمدورفت کے لیے بند ہونے سے شہریوں کو شدید مشکلات کا سامنا ہے۔ ضلع انتظامیہ کا کہنا ہے کہ 80 گاڑیوں پر مشتمل قافلہ تاحال ٹل سے کرم کے لیے روانہ نہیں ہوسکا ہے، تاہم روڈ کلیئرنس ملتے ہی قافلہ روانہ کیا جائے گا۔

یہ بھی پڑھیں: زیر زمین میزائل اور ڈرون کمپلیکسز کا جلد افتتاح کا اعلان، سپاہ پاسداران انقلاب

دوسری جانب ضلع کرم کی ٹل-پارا چنار شاہراہ پر صبح 6 بجے سے شام 6 بجے تک کرفیو نافذ کردیا گیا ہے جس کی آگاہی کے لیے لاؤڈ اسپیکر پر اعلانات کیے جا رہے ہیں۔ پولیس حکام نے عام شہریوں کو ہدایت دی ہے کہ کرفیو کے دوران مین روڈ پر آنے سے گریز کریں۔

خیال رہے کہ 4 جنوری کو لوئر کرم کے علاقے بگن میں نامعلوم شرپسندوں کی فائرنگ سے ڈی سی کرم سمیت 7 افراد زخمی ہوگئے تھے۔ اس کے بعد سے کرم کے لیے 3 ماہ بعد کھانے پینے کا سامان لے جانے والے قافلے کو روک دیا گیا تھا۔