فلسطینیوں سے اظہار یکجہتی، بھٹو کے پوتے ذوالفقار جونیئر کا جرمن فلم فیسٹیول میں شرکت سے انکار

شیعیت نیوز: فلسطینیوں سے اظہار یکجہتی کرتے ہوئے سابق وزیراعظم ذوالفقار علی بھٹو کے پوتے پاکستانی آرٹسٹ و فلم ساز ذوالفقار علی بھٹو جونیئر نے جرمنی میں ہونے والے ایک فلم فیسٹیول میں شرکت سے انکار کر دیا۔ تفصیلات کے مطابق سابق وزیراعظم ذوالفقار علی بھٹو کے پوتے اور میر مرتضیٰ بھٹو کے بیٹے ذوالفقار علی بھٹو جونیئر نے اپنی انسٹاگرام پوسٹ میں اس بات کا اعلان کیا کہ اب وہ جرمنی کے ’گوئٹے انسٹیٹیوٹ‘ کی جانب سے کرائے جانے والے فیسٹیول میں شرکت نہیں کریں گے۔

انہوں نے اپنی پوسٹ میں لکھا کہ وہ فلسطینی کارکن اور لکھاری محمد الکرد اور فلسطینی عوام سے اظہار یکجہتی کے طور پر جرمنی میں ہونے والے فلم فیسٹیول سے دستبردار ہو رہے ہیں، اب وہ اس کا حصہ نہیں بنیں گے۔ انہوں نے لکھا کہ جب سے انہیں معلوم ہوا ہے کہ مذکورہ فلم فیسٹیول کا انعقاد ’گوئٹے انسٹی ٹیوٹ‘ کر رہا ہے، تب سے انہوں نے فیصلہ کیا کہ اب وہ اس کا حصہ نہیں بنیں گے۔

ذوالفقار علی بھٹو جونیئر نے لکھا کہ ’گوئٹے انسٹی ٹیوٹ‘ نے گزشتہ ماہ فلسطینی لکھاری محمد الکرد کو فیسٹیول میں پہلے مدعو کیا اور بعد ازاں ان کی دعوت منسوخ کی، جس وجہ سے وہ مذکورہ ادارے کے بینر تلے ہونے والے فیسٹیول میں شرکت نہیں کر رہے۔ ساتھ ہی ذوالفقار علی بھٹو جونیئر نے اعلان کیا کہ اب وہ ’گوئٹے انسٹی ٹیوٹ‘ کے کسی بھی ایونٹ کا حصہ نہیں بنیں گے۔ انہوں نے اپنی پوسٹ میں مداحوں کا شکریہ بھی ادا کیا اور ساتھ ہی ان سے معذرت بھی کی۔ مذکورہ پوسٹ کے کیپشن میں انہوں نے بتایا کہ وہ جرمنی میں ہونے والے ’58 ہیون فلم فیسٹیول‘ میں شریک ہونے والے تھے، جس میں ان کی فلم پیش کی جانے تھی، مگر انہیں معلوم ہوا کہ مذکورہ فلم فیسٹیول کا اہتمام بھی ’گوئٹے انسٹی ٹیوٹ‘ کر رہا ہے، تو انہوں نے اس میں شرکت نہ کرنے کا فیصلہ کیا۔ انہوں نے ’گوئٹے انسٹی ٹیوٹ‘ کو فلسطین مخالف اور یہودیت کا حامی ادارہ بھی قرار دیا۔

یہ بھی پڑھیں: جنوبی ایشیا کا پائیدار امن بھی مسئلہ کشمیر سے جڑا ہے، علامہ ساجد علی نقوی

ذوالفقار علی بھٹو جونیئر سے قبل گزشتہ ماہ جون میں پاکستانی صحافی و ناول نگار محمد حنیف نے بھی فلسطینی لکھاری محمد الکرد سے اظہار یکجہتی کرتے ہوئے ’گوئٹے انسٹی ٹیوٹ‘ کے فیسٹیول میں شرکت سے انکار کر دیا تھا۔ محمد حنیف کو ’گئٹے انسٹی ٹیوٹ‘ کی جانب سے گزشتہ ماہ 23 سے 26 جون کو ہیمبرگ میں ہونے والی کانفرنس میں مدعو کیا گیا تھا۔ پاکستانی صحافی کے علاوہ مذکورہ کانفرنس میں دنیا بھر کے چیدہ چیدہ لکھاریوں، تاریخ نویسوں اور صحافیوں کو مدعو کیا گیا ہے۔ اسی کانفرنس میں فلسطین کے مزاحمتی شاعر اور لکھاری محمد الکرد کو بھی مدعو کیا گیا تھا، تاہم بعد ازاں ’گوئٹے‘ انتظامیہ نے ان کی دعوت منسوخ کرتے ہوئے ان کی جگہ دوسرے شخص کو مدعو کیا، جس پر احتجاج کرتے ہوئے محمد حنیف نے کانفرنس میں شرکت سے انکار کیا تھا اور اب ذوالفقار بھٹو جونیئر نے بھی انکار کر دیا۔