ڈیرہ اسماعیل خان، دوسگے شہید بھائیوں اور ایک دوست کے سوئم کا اجتماع، ایم ڈبلیوایم قائدین کی شرکت ، حکومتی بےحسی کی مذمت

شیعیت نیوز: مجلس وحدت مسلمین کے مرکزی سیکرٹری نوجوانان علامہ اعجاز حسین بہشتی نے ڈیرہ اسماعیل خان پروا میں تکفیری دہشت گردوں کے ہاتھوں شہید ہونے والے دو سگے بھائیوں اور ایک دوست کی رسم قل پر خطاب کرتے ہوئے کہا کہ دہشت گردوں کے سامنے بے بس ہو جانے والے حکمران اپنا حق حاکمیت کھو بیٹھتے ہیں۔ جس ریاست میں دہشت گرد آزاد اور شرفاء جان بچاتے پھریں وہاں کے حکمرانوں کو اپنے نااہلی کا اعتراف کرتے ہوئے حکومت سے الگ ہو جانا چاہیے۔

انہوں نے کہا کہ گزشتہ تین دہائیوں سے ڈی آئی خان میں خون کی ہولی کھیلی جارہی ہیں اور دہشت گرد دندناتے پھر رہے ہیں۔ اگر حکومت دہشت گردوں کو لگام نہیں دے سکتی تو پھر عوام کو اپنی حفاظت خود کرنے کے اقدامات کرنا پڑیں گے۔اپنی نسلوں کو دہشت گردوں کے رحم وکرم پر نہیں چھوڑا جا سکتا۔

یہ بھی پڑھیں: ریڈیو پاکستان کراچی اور بزمِ طلبہ کے روحِ رواں یاور مہدی صاحب طویل علالت کے بعد انتقال کر گئے

انہوں نے کہا کہ شہداء خدا کے ہاں عظیم اجر رکھتے ہیں اسی لیے شہداء کو مردہ کہنے کی شرعی ممانعت ہے۔اہلبیت اطہار علیہم السلام کی محبت میں شہادت ہمارے لیے سعادت ہے۔

مجلس وحدت مسلمین خیبر پختونخوا کے صوبائی سیکرٹری جنرل علامہ وحید کاظمی نے اپنے میں خطاب میں حکومتی بے حسی کی شدید الفاظ میں مذمت کی۔ شہداء کے سوئم میں مجلس وحدت مسلمین کے کارکناں کی بڑی تعداد شریک تھی۔