ایران نے سیمرغ سیٹلائٹ کامیابی کے ساتھ خلا میں بھیج دیا، امریکہ سیخ پا

شیعیت نیوز: ایران کی وزارت دفاع کے خلائی شعبہ کے ترجمان سید احمد حسینی نے کہا ہے کہ ایران نے سیمرغ سیٹلائٹ کے ذریعہ تین تحقیقی شپمنٹس کامیابی کے ساتھ خلا میں بھیج دیئے ہیں۔

انھوں نے کہا کہ مقامی سطح پر خلائی صلاحیت حاصل کرنے نیز سفیراور قاصد جیسے چھوٹے سیٹلائٹ خلا میں بھیجنے کے بعد ایران نے اعلیٰ صلاحیتوں کے حامل لانچرز کی تیاری پر غور شروع کردیا اور حضرت امام خمینی (رہ) خلائی بیس میں مزید توسیع اور ڈیزائن کا کام شروع ہوگيا ، آج سیمرغ سیٹلائٹ ایران کے خلائی شعبہ کا حصہ بن گيا ہے۔

سید احمد حسینی نے سیمرغ کی کارکردگی کے بارے میں مزید کہا کہ اس لانچ میں، خلائی بیس کے اجزاء کی کارکردگی اور سیٹلائٹ کے مراحل کی کارکردگی کو درست طریقے سے انجام دیا گیا، اور آخر میں اس لانچ کے مطلوبہ تحقیقی اہداف حاصل کیے گئے ہیں۔

وزارت دفاع کے خلائی ترجمان نے تاکید کرتے ہوئے کہا کہ اس خلائی تحقیقی مشن میں پہلی بار تین تحقیقی شپمنٹس ایک ساتھ 470 کلومیٹر کی بلندی اور 7350 میٹر فی سیکنڈ کی رفتار سے روانہ کیے گئے ہیں۔

یہ بھی پڑھیں : سعودی عرب کی مسلمانوں کو نقصان اور اسرائیل کو فائدہ پہنچانے کی تلاش جاری

ادھر امریکہ نے ایران کی جانب سے کامیابی کے ساتھ سیمرغ سیٹلائٹ کو خلا میں بھیجے جانے پر سخت تشویش کا اظہار کیا ہے۔

فارس خبر رساں ایجنسی کی رپورٹ کے مطابق وائٹ ہاوس نے کل رات ایک بیان جاری کرتے ہوئے ایران کی اس پیشرفت پر سخت تشویش کا اظہار کرتے ہوئے دعوی کیا کہ وہ ویانا مذاکرات میں سنجیدہ ہے۔

ایران نے اپنے ملک کے ماہرین کے تیار کردہ 3 تحقیقی آلات سے لیس سیمرغ سیٹلائٹ کو کل صبح کامیابی کے ساتھ خلا میں بھیج دیا تھا۔

قابل ذکرہے کہ مکمل طور پر مقامی ٹیکنالوجی کے ذریعے ایرانی ماہرین کا تیار کردہ خلائی راکٹ سیمرغ دو سو پچاس کلو وزن ، زمین کے مدار میں پانچ سو کلومیٹر کی بلندی پر پہنچانے کی صلاحیت رکھتا ہے۔