عراق، صوبے دیالہ کے شمالی علاقے میں داعشی دہشت گردوں کے دو حملے
شیعیت نیوز: عراق کے ایک سیکورٹی ذریعے نے کہا ہے کہ صوبے دیالہ کے شمالی علاقے میں داعشی دہشت گردوں نے دو حملے کئے ہیں۔
عراق کے ایک باخبر سیکورٹی ذریعے کے مطابق العظیم علاقے کے اطراف میں عراقی فوجی مرکز پر ہونے والے ان دہشت گردانہ حملوں میں چار عراقی فوجی اہلکار مارے گئے ہیں۔
اطلاعات کے مطابق داعشی دہشت گردوں نے دیالہ کے شمالی علاقے میں واقع الطالعہ میں ایک فوجی ہیڈ کوراٹر کو بھی نشانہ بنایا اور اس پر قبضہ کرلیا۔ اس علاقے میں عراقی فوجی اہلکاروں اور دہشت گرد عناصر کے درمیان شدید لڑائی بھی ہوئی۔
عراق کے بعض پریس ذرائع کا کہنا ہے کہ دہشت گرد عناصر کے حملوں کو پسپا کرنے کے لئے عراقی فضائیہ بھی سرگرم ہو گئی ہے۔
شہر موصل کے قریب ایک علاقے پر داعشی عناصر کے حملوں میں چار افراد شہید اور سات دیگر زخمی ہو گئے تھے۔
یہ بھی پڑھیں : ایرانی ایندھن کے بارے میں امریکی اندازے غلط ثابت، ایران کا شکریہ ادا کیا جانا چاہیے، حزب اللہ
داعش نے یہ حملہ صوبے نینوا میں موصل شہر کے قریب ’نائیہ‘ گاؤں پر کیا۔ مارے جانے والوں میں دو فوجی اور دو عام شہری شامل ہیں۔
گذشتہ ہفتے بھی داعش نے اسی طرح کا ایک حملہ صوبۂ کرکوک میں کیا تھا جس میں عراقی پولیس کے تیرہ جوان مارے گئے تھے۔
دوسری جانب عراق سے امریکی فوج نے فوجی ساز و سامان کا حامل ایک اور کارواں غیر قانونی طور پر شام کے شمال مشرقی علاقہ میں منتقل کیا ہے۔
شام نیوز ایجنسی نے شمال مشرقی صوبے الحسکہ کے مشرقی مضافات میں واقع السویدیہ اور الیعریہ گاؤں کے ذرائع سے بتایا ہے کہ امریکہ کا فوجی ساز و سامان کا حامل ایک کارواں عراقی کردستان کے الولید پاس سے غیر قانونی طور پر شام کی سرزمین میں داخل ہوا اور صوبے الحسکہ کے شمال میں المالکیہ علاقے میں واقع الجیر ایئر پورٹ کی جانب نکل گیا۔
یہ فوجی کارواں 45 ٹرکوں پر مشتمل تھا جس میں بڑے بڑے صندوق اور فریج لدے تھے جبکہ ایندھن کے کئی ٹینکر بھی ان کے درمیان موجود تھے۔
