افغانستان: صوبہ بلخ میں ایران، پاکستان اور ترکی کے قونصل خانے بند

شیعیت نیوز: افغانستان میں بڑھتی ہوئی بد امنی کے پیش نظر ایران، پاکستان اور ترکی نے صوبہ بلخ میں اپنے قونصل خانے بند کرنے کا اعلان کیا ہے۔

فارس خبر رساں ایجنسی کی رپورٹ کے مطابق طالبان کے ہاتھوں صوبہ بلخ کے کئی علاقوں پر قبضہ اور حالات خراب ہونے کے بعد ایران، پاکستان اور ترکی نے صوبہ بلخ میں اپنے قونصل خانے بند کردیئے اور ان ملکوں کے سفارت کار بلخ سے کابل منتقل ہو گئے ہیں۔

اس سے قبل بلخ کے گورنر فرهاد عظیمی نے کہا تھا کہ مزار شریف میں ایران، ترکی اور روس کے قونصل خانے بند ہو گئے ہیں۔

دوسری جانب افغان تاجک سرحدی گزرگاہ کے بعد بلخ صوبے میں ایک اور اہم سرحدی گزرگاہ پر طالبان کے قبضے کا خطرہ پیدا ہوگیا ہے۔

طالبان نے 24 گھنٹے کے دوران افغانستان کے مزید 13 اضلاع پر قبضہ کر لیا ہے۔

یہ بھی پڑھیں : افغانستان میں امریکی فوجی انخلا کے باوجود کچھ فوجیوں کو باقی رکھا جائے گا، جو بائیڈن

دوسری جانب افغان فورسز، طالبان کے خلاف فیصلہ کن آپریشن کے لیے تیار ہیں۔

بین الاقوامی میڈیا رپورٹ کے مطابق افغانستان میں طالبان کے توسیع پسندانہ عزائم اور کئی اہم مقامات پر قبضے کے پیش نظر افغان فورسز نے طالبان کی پُرتشدد کارروائیوں کے بعد بڑے پیمانے پر آپریشن کرنے کا اعلان کردیا ہے۔

افغان طالبان نے صوبہ قندھار اور پکتیکا کے مزید 13 اضلاع پر قبضہ کرلیا جبکہ طالبان کی جانب سے مزید پیش قدمی جاری ہے جبکہ افغان فورسز نے 9 صوبوں میں طالبان کے خلاف آپریشن کیا جس کے نتیجے میں 224 طالبان ہلاک ہوئے۔

افغان وزارتِ دفاع نے طالبان کی پیش قدمی کا اعتراف کرتے ہوئے کہا کہ افغان فورسز طالبان کے خلاف بھرپور آپریشن کے لیے تیار ہیں اور افغان شہرفیض آباد میں فورسز آپریشن کی بھرپور تیاری کے ساتھ پہنچ گئیں ہیں، جو طالبان کو زیر کر کے علاقے میں حکومت کا کنٹرول بحال کروائیں گی۔

واضح رہے کہ امریکی اور نیٹو افواج کا افغانستان سے انخلا جاری ہے اور طالبان کی جانب سے کئی علاقوں پر قبضہ کرنے کی وجہ سے افغانستان کی صورتحال انتہائی سنگین ہو گئی ہے۔