مھدی موعود ؑ کے قیام کے بعد عدل و انصاف کا بول بالا ہوگا اور ظلم و ستم کی جڑیں خشک ہو جائینگی، زہرا نقوی

شیعیت نیوز: پندرہ شعبان روز ولادت با سعادت صاحب العصر والزمان امام مھدی عج کی مناسبت سے مجلس وحدت مسلمین شعبہ خواتین کی مرکزی راہنما اور رکن پنجاب اسمبلی سیدہ زہرا نقوی نے اپنے تہنیتی پیغام میں کہا کہ نجات دہندہ عالم بشریت حجت خدا، مھدی برحق امام عصر علیہ الصلواۃ والسلام کی ولادت باسعادت کے پر نور موقع پر اہلبیت اطہار ع و کل عالم انسانیت کو دلی طور پر ھدیہ تبریک و تہنیت پیش کرتی ہوں۔

انہوں نے کہا حضرت بقیۃ اللہ عج وہ متفق علیہ ہستی ہیں جن کو تمام اسلامی فرقے تسلیم کرتے ہوۓ آپؑ کے ظہور پر اعتقاد رکھتے ہیں دنیا سے ظلم و ستم ، فساد و تباہی کے خاتمے اور عدل و انصاف مہر و محبت کی فضا قائم ہونے کے سلسلے میں آپؑ کی ذات سے لو لگاتے ہوئے تمام مکاتب فکر اپنے طور پر آپؑ کی آمد کے منتظر ہیں۔

یہ بھی پڑھیں: آئی ایس او کراچی ڈویژن کی جانب سے نیمہ شعبان پر مرکزی دعائیہ اجتماع آج شب نیٹی جیٹی پل پرمنعقد ہوگا

انہوں نے کہا مھدی موعود عج عدل الہی کی بنا پر عالمی حکومت قائم کریں گے آپ کے قیام کے بعد عدل و انصاف کا بول بالا ہوگا اور ظلم و ستم کی جڑیں خشک ہو جائینگی۔

انہوں نے کہا امام مھدی عج کے حقیقی ناصران میں شمار ہونے کے لیے پہلے ہمیں سچا منتظر بننا ہوگا ایسے انتظار کرنے والے افراد جنکے وجود کو ہر ذرہ امام عج کے لیے چشم برآہ ہو اور ہمارا کردار و گفتار قول و فعل تعلیمات اہلبیت ع کے مطابق ہو منتظرین کے لیے ضروری ہے کہ وہ اپنی اور اپنے معاشرے کی اصلاح کا فریضہ انجام دیتے ہوئے ظہور امام ع کی زمینہ سازی کریں۔

یہ بھی پڑھیں: اسلام اور قرآن کا نظام ہی دکھی انسانیت کا مداوا کرسکتا ہے، سرمایہ دارانہ نظام نے عوام کا خون چوسنے کے علاوہ کچھ نہیں کیا، علامہ ساجد نقوی

ان کا کہنا تھا کہ آج ہر طبقہ ہر گروہ ہر فرد شعوری یا لا شعوری طور پر کسی نجات دہندہ کی راہ دیکھ رہا ہے جو دنیا میں عدل اور امن قائم کرے گا جو مظلوموں کا دار رس اور ظالموں پر قہر بن کہ ٹوٹے گا اور جس کی حاکمیت میں کل انسانیت سکھ کا سانس لے سکے گی ۔

انہوں نے مذید کہا کہ شب نیمہ شعبان کی عبادات و مناجات میں ہماری سب سے اہم دعا تعجیل ظہور امام زمانہ عج کی ہونی چاہیے کیونکہ آپ عج کے ظہور اور قیام کے ذریعے ہی محرومی ناکامی اور بے چارگی کے راستے بند ہوجائینگے مستکبرین کا تختہ الٹ جائے گا اور مستضعفین اور محروم غالب آجائینگے اور پوری کائنات کے اندر صرف اور صرف توحید کا پرچم سر بلند نظر آے گا ۔ان شاء اللہ ۔