لاک ڈاؤن سے پریشان عوام پر مہنگائی بم نے مزید قیامت ڈھا دی ہے، علامہ اقتدار نقوی

شیعت نیوز: مجلس وحدت مسلمین جنوبی پنجاب کے سیکرٹری جنرل علامہ اقتدار حسین نقوی نے کہا ہے کہ ماہ رمضان المبارک کے شروع ہوتے ہی مہنگائی کا نا تھمنے والا طوفان آگیا ہے، انسانی ضرورت کی ہرچیز کی قیمتوں کو آگ لگ چکی ہے۔ مگر ابھی تک عوام کو اس طوفان سے بچانے کیلئے کہیں بھی حکومتی رٹ نظر نہیں آرہی، ذخیرہ اندوز دونوں ہاتھوں سے عوام کو لوٹ رہے ہیں، مگر کوئی بھی حکومتی محکمہ انہیں روکنے سے قاصر ہے۔

یہ بھی پڑھیں: تمام مذہبی طبقات کوروناوائرس سے بچاؤکیلئےطے شدہ نکات اور احتیاطی تدابیر پر عمل کریں،علامہ حسن ظفر نقوی

علامہ اقتدار حسین نقوی نے کہا کہ ضرورت اس امر کی ہے کہ حکومت اشیائے ضروریہ کی قیمتوں میں کمی کیلئے جامع حکمت عملی تیارکرے جس کے زریعے منڈیوں سے لے کر گلی محلے تک ہر چیز کی قیمتوں پر حکومت کا کنٹرول نظر آئے۔ اگر حکومت عوام کی صحیح معنوں میں ریلیف دینا چاہتی ہے تو اس کا بہترین طریقہ یہ ہے کہ اشیائے ضروریہ کی قیمتوں میں واضح کمی کردی جائے۔

یہ بھی پڑھیں: سرگودھا قرنطینہ سینٹر میں موجود تمام 34زائرین کورونا سے کلیئرقرار ،گھرروانہ

انہوں نے کہا کہ لاک ڈاون سے پریشان عوام پر مہنگائی بم نے مزید قیامت ڈھا دی ہے۔ اس مرتبہ کرونا وائرس کے پیش نظر رمضان بازار نہیں لگائے گئے اور یوٹیلٹی سٹورز کے زریعے سبسڈی دے کر عوام کی سستی اشیا مہیا کرنے کا فیصلہ کیا گیا مگر کوئی بھی یوٹیلیٹی سٹور ایسا نہیں ہے جہاں استعمال کی تمام اشیا دستیاب ہوں۔ چینی اور آٹا یا تو نایاب ہے اور اگر کہیں دستیاب ہے تو اس کے ساتھ دیگر اشیا خریدنے کی شرائط رکھی گئی ہیں جو کہ عوام کے ساتھ ظلم ہے، حکومت کو چاہیے کہ وہ عام ضروریات زندگی کی اشیاء رعایتی نرخوں پر بلاتعطل عوام تک پہنچانے کیلئے لائحہ عمل کو بہتر کرے۔