اسٹریٹ کرائمز کی وارداتوں میں بیگناہ شہریوں کا قتل عام قابل مذمت ہے،علامہ باقر زیدی

شیعت نیوز : شہر قائد میں اسٹریٹ کرائمز کی بڑھتی وارداتوں نے شہریوں کی زندگی اجیرن کردی ہے۔جرائم پیشہ عناصر کی کاروائیوں میں بیگناہ شہریوں کے قتل عام پر صوبائی حکومت اور قانون نافذ کرنے والے اداروں کی مجرمانہ خاموشی قابل مذمت ہے۔

اطلاعات کے مطابق مجلس وحدت مسلمین صوبہ سندھ کے سیکریٹری جنرل علامہ باقر عباس زیدی  نے آج علی الصبح گلشن اقبال کے علاقے موچی موڑ پر اسٹریٹ کرمنلز کی کاروائی میں ہمدرد میڈیکل یونیورسٹی کی طالبہ کی ہلاکت کی شدید الفاظ میں مذمت کرتے ہوئے کہا کہ کراچی کے عوام اسٹریٹ کرمنلز کے ہاتھوں یرغمال بنے ہوئے ہیں۔انھوں نے کہا کہ پاکستان کی شہہ رگ کہلائے جانے والے شہر کراچی کو جرائم پیشہ عناصر کے رحم و کرم پر چھوڑ کر کیا ثابت کیا جا رہا ہے۔ علامہ باقر زیدی کا کہنا تھا کہ شہر میں اسٹریٹ کرائمز کی وارداتوں میں اضافہ سندھ حکومت اور پولیس کی کارکردگی پر سوالیہ نشان ہے۔

یہ بھی پڑھیں :علامہ باقر عباس زیدی کی ایم ڈبلیوایم کےوفدکے ہمراہ کمشنر کراچی سے ملاقات

علامہ باقر عباس زیدی نے وزیراعلیٰ ،آئی جی اور ڈی جی رینجرز سندھ سے پرزور مطالبہ کیا کہ وہ شہر میں اسٹریٹ کرائمز کی بڑھتی وارداتوں اور اس نتیجے میں معصوم شہریوں کی جان و مال عزت و آبرو کے ناقابل تلافی نقصانات کا فوری نوٹس لیتے ہوئے کراچی کے عوام کو ان خونخوار عناصر سے محفوظ کرنے کے حوالے سے اقدامات کریں۔