امریکی فوج کی موجودگی میں جنگ بندی ممکن نہیں: طالبان

ماسکو میں دوسرے روز افغان سیاستدانوں اور طالبان کا بند کمرہ اجلاس ہوا، افغان رہنماؤں کی جانب سے جنگ بندی کا مطالبہ مسترد کرنے پر ترجمان طالبان وفد سہیل شاہین کا کہنا تھا کہ افغانستان پر قابض امریکی اورغیر ملکی افواج کے ہوتے ہوئے جنگ بندی نہیں ہوسکتی۔

طالبان رہنما شیر محمد ستانکزئی کا کہنا تھا کہ امریکا سے مذاکرات کے اگلے دور میں غیر ملکی افواج کے انخلا پر معاہدہ ممکن ہے۔

امریکا اور طالبان کے مابین اب تک ہونے والے مذاکرات کے 6 دور کسی نتیجے کے بغیر ختم ہو گئے اور مذاکرات کا ساتواں دور قطر میں اگلے ماہ متوقع ہے۔

واضح رہے کہ ماسکو میں افغان سیاستدانوں کے گروپ کی قیادت سابق افغان صدر حامد کرزئی کررہے ہیں، جبکہ چودہ رکنی طالبان ٹیم کی قیادت اس گروپ کے شریک بانی عبدالغنی برادر نے کی۔اس ملاقات کے دوران افغانستان میں بحالی امن پر غور کیا گیا۔