دشمن ایران کے قدرتی ذخائر پر تسلط کی خواہش اپنی قبر میں ساتھ لیکر جائیں گے، آیت اللہ العظمٰی سید علی خامنہ ای
شیعیت نیوز: رہبر انقلاب اسلامی آیت اللہ العظمٰی سید علی خامنہ ای نے ایرانی عوام کی جانب سے مذہبی امور اور انقلابی اقدار کی مکمل پابندی اور شاندار وفاداری کی تعریف کرتے ہوئے اس کو ایرانی عوام کے اتحاد کا مظہر قرار دیا۔ رہبر انقلاب اسلامی نے مشہد مقدس میں حضرت امام علی رضا علیہ السلام کے حرم مطہر میں زائرین کے عظیم الشان اجتماع سے خطاب کرتے ہوئے کہا کہ اللہ کا شکر ادا کرتا ہوں کہ اس نے ایک بار پھر یہ توفیق عطا فرمائی کہ میں اس روحانی اور ملکوتی بارگاہ میں آپ سے خطاب کروں۔ آیت اللہ العظمٰی سید علی خامنہ ای نے نئے ہجری شمسی سال کو ملک کے لئے ایک اہم سال قرار دیتے ہوئے کہا کہ یہ سال اقتصادی لحاظ سے بھی اور آئندہ صدارتی اور بلدیاتی انتخابات کی بنا پر سیاسی لحاظ سے بھی بہت اہم ہے۔ رہبر انقلاب اسلامی نے کہا کہ گذشتہ برس ایران کے عوام نے کچھ اقتصادی مشکلات کے باوجود سیاسی اور انقلابی میدانوں میں شاندار کارنامے رقم کئے اور یوم القدس اور یوم آزادی کے جلوسوں میں تاریخی شرکت کرکے انقلاب سے اپنی وفاداری کا ایک بار پھر بھرپور ثبوت پیش کیا۔
انہوں نے کہا کہ مذہبی و روحانی اجتماعات اور پروگراموں میں شرکت کے حوالے سے بھی گذشتہ برس ایران کے مومن عوام کی شرکت پہلے سے کہیں زیادہ تھی اور یہ بہت ہی اہم بات ہے۔ انہوں نے کہا کہ یوم آزادی کے جلوسوں، ماہ محرم و صفر کے اجتماعات اور پروگراموں میں ایرانی عوام کی وسیع شرکت، دوست و دشمن دونوں کے لئے اہم پیغام کی حامل ہے اور اس سے دوست و دشمن سب کے سامنے ایرانی عوام نے اپنی شناخت کو منوایا ہے۔ رہبر انقلاب اسلامی نے کہا کہ اس طرح کے اجتماعات میں ایرانی عوام کی وسیع پیمانے پر شرکت اس بات کو ثابت کرتی ہے کہ ایران کے عوام، دین و مذہب کے امور کی پابندی کا معاملہ ہو یا ملک کے سیاسی معاملات اور انقلابی اقدار کی حفاظت کی بات ہو، ہر میدان میں پوری طرح متحد ہیں۔ رہبر انقلاب اسلامی نے ایرانی عوام کے اتحاد اور انقلاب و اسلامی نظام نیز مذہبی امور کی پابندی کی اہمیت پر زور دیتے ہوئے کہا کہ نیا سال بھی اس لحاظ سے بہت ہی اہمیت کا حامل ہے۔
انہوں نے اقتصادی مسائل کو ملک کے مسائل میں سرفہرست قرار دیتے ہوئے کہا کہ ضرورت اس بات کی ہے کہ اقتصادی میدان میں سرعت عمل کا مظاہرہ کیا جائے۔ انہوں نے کہا کہ اگر ایران کے عوام کے نقطہ نگاہ سے اقتصادی مسائل سرفہرست ہیں تو دشمن نے بھی انہی مسائل کو اپنی ترجیحات میں قرار دے رکھا ہے، دشمن، ایران کو اقتصادی میدان میں کمزور کرکے عوام اور حکومت کے درمیان فاصلہ پیدا کرنا چاہتا ہے، تاکہ وہ اس طرح اپنے مقاصد حاصل کرسکے۔ انہوں نے کہا کہ ایران کے نادان اور بے دین دشمن برسوں سے اس میدان میں اپنی کوششیں جاری رکھے ہوئے ہے، لیکن وہ اب تک ناکام رہا ہے اور آئندہ بھی اس کو کامیابی حاصل نہیں ہوگی۔ رہبر انقلاب اسلامی نے ایران اور ایرانی عوام کے لئے اسلامی نظام کی خدمات کا ذکر کرتے ہوئے کہا کہ اسلامی جمہوری نظام نے اس عرصے میں انتہائی غیر معمولی کارنامے انجام دیئے ہیں اور عوام کی بہت زیادہ خدمت ہے۔ انہوں نے کہا کہ اگر ان خدمات کا طاغوتی حکومت کے دور سے موازنہ کیا جائے تو واضح ہو جائے گا کہ ایران کے اسلامی جمہوری نظام نے عوام کی کتنی زیادہ خدمت کی ہے۔
رہبر انقلاب اسلامی نے علمی اور سائنسی میدانوں میں ایرانی نوجوانوں کی کامیابیوں کا حوالہ دیتے ہوئے کہا کہ اسلامی انقلاب کی کامیابی کے بعد سے ایران میں علمی ترقی پچیس گنا زیادہ ہوئی ہے۔ انہوں نے ایرانی نوجوانوں میں پائے جانے والی بے پناہ صلاحیتوں کا ذکر کرتے ہوئے کہا جب ہم یہ کہتے ہیں کہ مستقبل میں ایران میں بہت ہی اہم کام انجام پائیں گے تو بااستعداد نوجوانوں کی صلاحیتوں کو دیکھتے ہوئے ہی یہ بات کہی جاتی ہے۔ آیت اللہ العظمٰی سید علی خامنہ ای نے ایران کے عظیم قدرتی ذخائر کی جانب اشارہ کرتے ہوئے کہا کہ گیس کے ذخائر کے لحاظ سے ایران دنیا میں پہلے نمبر پر ہے۔ انہوں نے کہا کہ دشمن نے بلاوجہ اپنی نظریں ایران پر نہیں جمائی ہیں، دشمن چاہتے ہیں کہ ایران کے قدرتی ذخائر پر تسلط حاصل کر لیں۔ انہوں نے کہا کہ البتہ یہ دشمنوں کی پرانی خواہش ہے اور ان کی یہ خواہش کبھی بھی پوری نہیں ہوسکے گی اور وہ اپنی یہ خواہش قبر میں لے کر جائیں گے۔ رہبر انقلاب اسلامی نے ایران کے آئندہ صدارتی اور بلدیاتی انتخابات کی اہمیت پر زور دیتے ہوئے کہا کہ میرے لئے جو چیز سب سے زیادہ اہم ہے، وہ یہ ہے کہ لوگ زیادہ سے زیادہ پولنگ اسٹیشنوں پر جاکر اپنے حق رائے دہی کا استعمال کریں۔
