محرم ہمیں ایثاروقربانی، حق و صداقت اور احترام انسانیت کا سبق دیتا ہے،علامہ راغب نعیمی
شیعیت نیوز: جامعہ نعیمیہ لاہور میں نعیمین ایسوسی ایشن کے عہدیداروں سے خطاب کرتے ہوئے معروف دینی سکالر و ناظم اعلیٰ جامعہ نعیمیہ علامہ راغب نعیمی نے کہا ہے کہ محرم الحرام میں قیام امن کیلئے ضابط اخلاق کی پاسداری کی جائے، موجودہ حالات میں ملک کسی بھی قسم کی اندونی وبیرونی خلفشار کا متحمل نہیں ہو سکتا، انتہاءپسندی کے خاتمے کیلئے تمام مذہبی و سیاسی جماعتوں کے قائدین متحد ہو جائیں۔ انہوں نے مزید کہا کہ امن وامان کے قیام کیلئے مدارس اہلسنت اور علماء اہلسنت ریاستی اداروں کیساتھ ہر ممکن تعاون جاری رکھیں۔ محرم الحرام کے موقع پر پولیس اہلکار فول پروف سکیورٹی انتظامات کو یقینی بنائیں، شرانگیز تقاریر، بیانات اور فرقہ ورانہ سرگرمیوں پر کڑی نظر رکھی جائے۔ انہوں نے کہا کہ محراب ومنبر سے اتحاد و اتفاق کا درس دیا جائے، پاکستان دشمن قوتیں وطن عزیز کیخلاف حملے آور ہو چکی ہیں، ہمیں اتحاد کی قوت سے دشمن کے ناپاک عزائم کو ناکام بنانا ہوگا۔ راغب نعیمی نے کہا کہ موجودہ تمام بحرانوں کا واحد حل اسلامی تعلیمات پر عمل کرنے میں ہے، امن کی بحالی کیلئے اتحاد و اتفاق کا فروغ وقت کا اہم تقاضا ہے، محرم الحرام اسلامی سال کا پہلا بابرکت مہینہ ہے جو ہمیں ایثاروقربانی، حق و صداقت اور احترام انسانیت کا سبق دیتا ہے۔
