عبدالرحمان نامی مبینہ خودکش بمبار ملتان سے گرفتار

سی سی پی او لاہور نے صحافیوں سے بات کرتے ہوئے بتایا ہے کہ حساس اداروں نے جس مبینہ خودکش حملہ آور کا خاکہ جاری کیا تھا، کہ 17 سالہ راوی روڈ لاہور کا رہائشی عبدالرحمان گزشتہ دو ماہ سے غائب ہے اور یہ مشتبہ نوجوان ممکنہ طور پر دہشت گردی کی کاروائی کر سکتا ہے، خفیہ اطلاع پر لاہور پولیس کی ریڈنگ پارٹی نے ملتان میں چھاپہ مار کر اس مبینہ دہشت گرد عبدالرحمان کو گرفتار کر لیا ہے، جسے جلد لاہور منتقل کیا جائے گا، جبکہ مزید حقائق تفتیش کے بعد سامنے آئیں گے۔ یاد رہے کہ مبینہ دہشت گرد کا خاکہ لاہور شہر اور صوبہ پنجاب کے تمام تھانوں میں بھجوا دیا گیا تھا اور اضلاع میں شہروں اور شاہراہوں پر پولیس کے ناکوں پر بھی دیا گیا تھا۔ یاد رہے کہ آپریشن ضرب عضب کے رد عمل میں واہگہ بارڈر پر ہونے والے خودکش حملے کی طرح دہشت گردی کے خطرات کی وجہ سے پورے ملک میں سیکورٹی ہائی الرٹ ہے۔