سعودی عرب شام میں دہشتگردوں کی سرپرستی ترک کردے، پیر معصوم نقوی

جمعیت علماء پاکستان نورانی کی سپریم کونسل کے چیئرمین پیر سید محمد معصوم حسین نقوی نے شام میں اصحاب رسول کے مزارات کی بے حرمتی کی مذمت کرتے ہوئے سعودی عرب، ایران اور شام کی حکومتوں سے فرقہ وارانہ کشیدگی سے دور رہنے کی اپیل کی ہے۔ آستانہ عالیہ حسینی مجددی میں عقیدت مندوں کے اجتماع سے خطاب کرتے ہوئے پیر معصوم نقوی نے کہا کہ مزارات اصحاب و اہل بیت رسول شعائراللہ اور اسلام کے مراکز ہیں۔ ان کی توہین کو برداشت نہیں کیا جائے گا۔ انہوں نے مزارات پر حملوں پر وزارت خارجہ کی خاموشی پر تنقید کرتے ہوئے کہا کہ حکومت اہلبیت و صحابہ کرام کے مزارات مسمار کرنے والوں کی بجائے پاکستانی قوم کی ترجمانی کرے اور شام کے سفیر کو طلب کرکے پاکستانی عوام کے مجروح اور رنجیدہ جذبات سے آگاہ کرے۔