سعودی عرب سے دوستی اور ایران سے دشمنی پاکستان کے مفاد میں نہیں، شیریں مزاری

پاکستان تحریک انصاف کی مرکزی سیکرٹری اطلاعات شیریں مزاری کا کہنا ہے کہ سعودی عرب سے ڈیڑھ ارب ڈالر لینے کے بعد حکومت نے شام کے حوالے سے پالیسی میں یو ٹرن لے لیا ہے۔ ان خیالات کا اظہار انہوں نے لاہور میں پاکستان کی خارجہ پالیسی کے حوالے سے منعقدہ ایک سیمینار سے خطاب کرتے ہوئے کیا۔ سیمینار سے اعجاز احمد چودھری، میاں محمود الرشید اور دیگر مقررین نے بھی خطاب کیا۔ شیریں مزاری نے کہا کہ قومی خارجہ پالیسی کی بنیاد ذاتیات کی بجائے اصولوں پر ہونی چاہئے۔ انہوں نے کہا کہ ایران کو تنہا کرنے کی کوشش کی جا رہی ہے، سعودی عرب سے دوستی اور ایران سے دشمنی پاکستان کے مفاد میں نہیں۔ مرکزی سیکریٹری اطلاعات پی ٹی آئی کا کہنا تھا کہ پاکستان نے امریکا سے دوستی کی بہت زیادہ قیمت ادا کی ہے، امریکا کی جنگ سے باہر نکلنے سے پاکستان میں دہشتگردی کم ہوگی۔ شیریں مزاری نے مزید کہا کہ اسرائیل کو تسلیم کرنے سے کشمیر پر پاکستان کا مؤقف کمزور ہوگا۔