حکومت بتائے کہ سعودی عرب سے کس مد میں پیسے لیے اور قوم نے کیا قربانی دینی ہے، زاہد خان

عوامی نیشل پارٹی کے سیکرٹری اطلاعات سینیٹر زاہد خان نے کہا ہے کہ حکومت قوم کو ڈیڑھ ارب ڈالر کے بارے میں بتائے کہ سعودی عرب سے کس مد میں پیسے لیے اور قوم نے اس کے بدلے کیا قربانی دینی ہے۔ پارلیمنٹ ہاؤس میں میڈیا سے بات چیت کرتے ہوئے سینیٹر زاہد خان نے کہا کہ حکومت قوم کو ڈیڑھ ارب ڈالر کے بارے میں بتائے کہ انہوں نے سعودی عرب سے کس مد میں یہ پیسے لیے ہیں اور اس کے بدلے میں قوم نے کیا قربانی دینی ہے۔ انہوں نے کہا کہ ضیاءالحق کے دور میں بھی سعودی عرب سے چار ارب ڈالر ملے تھے جس کا خمیازہ آج پوری قوم بھگت رہی ہے۔ سینیٹر زاہد خان کا کہنا تھا کہ کہیں ایسا تو نہیں ہے کہ ڈیڑھ ارب ڈالر کے بدلے قوم کو شام کی جنگ یا پھر امریکہ کے جانے کے بعد طالبان کو افغانستان میں دھکیل دیا جائے گا۔ انہوں نے کہا کہ عمران خان نے وزیراعظم میاں نواز شریف کے ساتھ مک مکا کرلیا ہے اور ایک پارک کے بدلے اپنے ضمیر کا سودا کیا ہے۔ انہوں نے کہا کہ قوم عمران خان سے سوال کرتی ہے کہ الیکشن کے دوران کیے گئے وعدے کب پورے ہوں گے۔