شورکوٹ کے علاقے خاکی لکھی میں شرپسندوں کا جلوس عزا پر پتھراؤ، متعدد زخمی

پنجاب کے ضلع جھنگ کی تحصیل شورکوٹ کے نواحی علاقے خاکی لکھی میں چہلم شہدائے کربلا کے جلوس پر کالعدم جماعت کے شرپسندوں کی جانب سے پتھراؤ کے بعد علاقے میں صورت حال کشیدہ ہو گئی ہے جبکہ متعدد عزاداروں کے زخمی ہونے کی اطلاعات ہیں۔ ذرائع کے مطابق چہلم شہدائے کربلا سے سلسلہ میں برآمد ہونے والا جلوس اپنے مقررہ راستے پر گامزن تھا کہ کالعدم جماعت کے چند شرپسندوں نے علم غازی عباس علیہ السلام اور عزاداری میں مصروف مومنین پر پتھراؤ شروع کر دیا جس سے متعدد عزادار زخمی ہو گئے۔ اس موقع پر پولیس خاموش تماشائی بنی رہی تاہم علاقے میں صورت حال شدید کشیدہ ہو گئی ہے۔ اطلاعات کے مطابق شورکوٹ اور نواحی علاقوں سے پولیس کے نفری کو طلب کر لیا گیا ہے۔ آخری اطلاعات تک علاقے میں خوف و ہراس کی فضا تھی اور کشیدگی برقرار ہے۔