کارکنان پاکستان پیپلزپارٹی کی کامیابی کیلئے بھرپور مہم چلائیں، علامہ عارف واحدی

اسلامی تحریک پاکستان کے مرکزی سیکرٹری جنرل علامہ عارف حسین واحدی نے کہا ہے کہ پاکستان پیپلزپارٹی سے سیاسی مفاہمت ہوچکی، کارکنان پیپلزپارٹی کی کامیابی کیلئے بھرپور انتخابی مہم چلائیں، شرپسند عناصر ملک میں عدم استحکام پیدا کرکے الیکشن ملتوی کرانا چاہتے ہیں، شرپسندوں کی کارروائیوں اور مذموم مقاصد سے انتخابی عمل سے پیچھے نہیں ہٹیں گے۔ ان خیالات کا اظہار انہوں نے ہفتہ کے روز مرکزی دفتر میں پارٹی عہدیداروں سے گفتگو کے دوران کیا۔ انہوں نے کہا کہ پاکستان پیپلزپارٹی سے عام انتخابات 2013ء کیلئے مفاہمت ہوئی ہے اور انتخابات میں کامیابی کیلئے کارکنان پیپلزپارٹی کی بھرپور مہم چلائیں۔ انہوں نے کہا کہ دہشت گرد ملک میں امن و امان کی صورتحال خراب کرکے انتخابات کا التواء چاہتے ہیں، تمام سیاسی قوتوں کو مل کر اس سازش کو ناکام بنانا چاہیے، تاکہ ملک میں جمہوریت فروغ پائے اور معاشی و امن وامان کی صورتحال مستحکم ہو۔

علامہ عارف واحدی نے کہا کہ ملک بھر میں اسلامی تحریک پاکستان کے کارکنان پیپلز پارٹی کے امیدواروں کی کامیابی کو یقینی بنانے، پولنگ اسٹیشنوں پر اپنے ووٹرز کی مناسب رہنمائی کے لئے آنے والے ایام میں رات دن ایک کریں اور بھرپور عوام رابطہ مہم کے ذریعہ انتخابی مہم کو بہتر انداز میں پایہ تکمیل تک پہنچائیں۔ انہوں نے اس توقع کا اظہار کیا کہ اسلامی تحریک اور پاکستان پیپلز پارٹی پارلیمنٹرینز کی سیاسی مفاہمت کے نتیجے میں ملک میں حقیقی اور پائیدار جمہوریت کے فروغ میں مدد ملے گی اور ملکی ترقی و عوامی خوشحالی کی نئی راہیں کھلیں گی۔