ہم یتیم نہیں ہیں کہ تم گستاخی کررہے ہو/ جاسوس ڈھونڈنا ہے تو اسرائیل اور امریکہ جانے والوں میں ڈھونڈو

رپورٹ کے مطابق ترکی کے نامور شیعہ عالم شیخ صلاح الدین اوزگوندوز نے حضرت امام علی بن موسی الرضا (علیہ السلام) کی زيارت کی غرض سے ایران آنے والے ترک زائرین سے سرکاری اداروں کی تفتیش کو غیر قانونی اور غیر انسانی قرار دیا ہے اور حکومت سے مطالبہ کیا ہے کہ تفتیشی عملے پر مقدمہ چلائے۔
شیخ صلاح الدین اوزگوندوز نے کہا: انھوں نے 13 سالہ بچوں کو غیر قانونی طور پر حراست میں لیا اور ان سے تفتیش کی اور بعض پولیس اہلکاروں نے ان کی بےحرمتی کی کوشش کی جن پر مقدمہ چلانا پڑے گا۔
انھوں نے کہا: ہم ترکی کے یتیم فرزند نہيں ہیں کہ جو بھی پولیس اہلکار چاہے ہم سے تفتیش کرے؛ ہم اس ملک کے مالک ہیں۔
شیخ صلاح الدین نے زور دے کر کہا: اگر تم جاسوس پکڑنا چاہتے ہو تو ان لوگوں سے ڈرو جو امریکہ جاکر واپس آتے ہیں یا مقبوضہ فلسطین کا سفر اختیار کرتے ہیں یا پھر یورپ جاتے ہیں اور ملک میں واپس آتے ہیں۔
واضح رہے کہ ایغدیر شہر کے 25 نوجوانوں اور کم سن لڑکوں نے ستمبر کے آغاز میں ایران کا دورہ کیا اور مشہد مقدس میں حضرت امام رضا(ع) کے حرم مطہر میں حاضری دی اور زيارت کی اور جب وہ ترکی واپس گئے تو انہیں غیر قانونی طور پر زیر تفتیش رکھا گیا۔
ان افراد کے والدین نے گذشتہ ہفتے ایغدیر کے ایک ہوٹل میں اجتماع کیا اور اپنے بچوں سے اداروں کی تفتیش کو غیر انسانی قرار دیتے ہوئے اپنے بچوں پر لگائے جانے والے جاسوسی کے الزام کی پرزور الفاظ میں مذمت کی۔
انھوں نے کہا: ہماے بچے ایک ثقافتی اور سماجی و دینی پروگرام میں شرکت کے لئے قانونی دستاویزات کے ساتھ ایران کے دورے پر گئے تھے جو اب واپس آگئے ہیں۔
انھوں نے اعلان کیا کہ اگر اس قسم کے اقدامات اس لئے عمل میں لائے جارہے ہیں کہ ہم اپنے دینی اور مذہبی اعتقادات کو ترک کریں گے تو ایسا ہونا ہرگز ممکن نہيں ہے۔
۔۔۔۔۔۔۔۔۔۔۔۔۔۔۔