عراقی صوبہ دیالہ میں انتہائی مطلوب دہشتگرد گروہ گرفتار
عراق کے صوبے دیالہ کی سیکیورٹی کمیٹی کے سربراہ صادق الحسینی نے کہا ہے کہ ایران کی گیس پائپ لائن بچھانے والی کمپنی کے کارکنوں کے خلاف دھشتگردانہ حملے میں ملوث مسلح افراد کی تلاش کے لئے کوششوں کا سلسلہ جاری ہی تھا کہ عراق کی سیکیورٹی فورسیز کے ایک کامیاب آپریشن میں اس دھشتگردانہ حملے میں ملوث سات دھشتگردوں کو گرفتار کرلیا گیا ہے۔ صادق الحسینی نے کہا کہ اس حملے میں جاں بحق اور زخمی ہونے والوں کو سرحدی راستے سے ایران منتقل کردیا گیا ہے۔ واضح رہے کہ گذشتہ روز عراق کے مشرقی صوبے دیالہ کے شمال مشرقی شہر بعقوبہ کے امام ویس کے علاقے میں ایران کی گیس پائپ لائن بچھانے والی کمپنی کے کارکنوں کو لے جانے والی گاڑی کے راستے میں ہونے والے دھماکے کے نتیجے میں کئی ایرانی جاں بحق و زخمی ہوئے ہیں۔ عراق میں اسلامی جمہوریہ ایران کے سفیر حسن دانائی فر نے اس دھشتگردانہ حملے میں دو ایرانی کارکنوں کی شہادت کی تائید و تصدیق کی ہے۔