یوم قدس، غاصب اسرائيل سے نفرت و بیزاری کا دن

ڈاکٹرحسن روحانی نے آج عالمی یوم قدس کی عظیم ریلی میں شرکت کی اور نامہ نگاروں کے ساتھ گفتگو میں کہا کہ غزہ کے مظلوم عوام کو امن و سکون کی زندگي گذارنی چاہئے اور اس کام کے لئے اور فلسطینی کاز کی حمایت کے لئے تمام مسلمانوں کو اٹھ کھڑا ہوناچاہئے ۔ صدر مملکت حسن روحانی نے گذشتہ برسوں کی نسبت اس سال کے عالمی یوم قدس کےجلوسوں کو مختلف بتاتے ہوئے، غزہ کے عوام کے خلاف اسرائیلی حکومت کی جارحانہ کاروائیوں کو نسل کشی قرار دیا اور کہاکہ غزہ میں بے گناہ فلسطینی بچوں اور عورتوں کے قتل عام پر جو لوگ خاموشی اختیار کئے ہیں انہیں تاریخ کبھی معاف نہيں کریگی اور تاریخ ہی ان کے بارے میں فیصلہ کرے گی ۔ ڈاکٹر روحانی نے کہا کہ تمام مسلمانوں کو متحد ہوجانا چاہئے کیوں کہ صہیونی حکومت کے مقابلے کے لئے، اتحاد، استقامت اور مزاحمت کے سوا اور کوئی راستہ نہیں ہے اور اس بات کی امید نہیں کی جاسکتی کہ بین الاقوامی اداروں پر بھروسہ کرکے فلسطینیوں کا حق حاصل کیا جاسکتاہے ۔