ایران، پاکستان اور ترکی کا اسلام آباد-تہران-استنبول ریلوے کوریڈور دوبارہ فعال کرنے پر اتفاق

شیعیت نیوز: ایران، پاکستان اور ترکی نے باہمی روابط اور تجارتی تعلقات کو مزید وسعت دینے کے لیے مشترکہ ریلوے کوریڈور کو دوبارہ فعال اور منظم کرنے پر اتفاق کیا ہے۔

تفصیلات کے مطابق ایرانی وزارت شاہراہ و شہری ترقی کے بین الاقوامی امور کے سربراہ امین ترفع نے بتایا کہ اسلام آباد، تہران اور استنبول نے مشترکہ ریلوے کوریڈور کی بحالی پر اتفاق کیا ہے۔ ان کے مطابق ریلوے نقل و حمل، چاہے دو طرفہ ہو یا ٹرانزٹ، تینوں ممالک کے درمیان اقتصادی تبادلے بڑھانے میں فیصلہ کن کردار ادا کرے گی۔

یہ بھی پڑھیں: مستقبل میں جنگ ہوئی تو ایران میزائل کے ساتھ دیگر ہتھیار بھی استعمال کرے گا، ایران جنرل

امین ترفع نے کہا کہ تہران-اسلام آباد-استنبول ریلوے کوریڈور ایران اور پاکستان کے قدیم رابطوں میں سے ایک ہے جو برسوں سے استعمال میں رہا ہے مگر اب اسے دوبارہ فعال کرنے کی ضرورت ہے۔ تینوں ممالک نے اس ریلوے پر ہفتہ وار باقاعدہ ٹریفک کے قیام کا فیصلہ کیا ہے، جو کوریڈور کی ترقی میں اہم کردار ادا کرے گا۔

انہوں نے مزید کہا کہ زاہدان سے میرجاوہ تک موجودہ ریلوے لائن کی تجدید نہایت ضروری ہے کیونکہ یہ تقریباً ایک صدی پرانی ہے اور جدید معیار کے مطابق اپ گریڈ کرنے کی ضرورت ہے۔ اس کے علاوہ ایران اور پاکستان نے باہمی اور ٹرانزٹ ٹرین کی بحالی، سرحدی ٹرمینلز کی گنجائش بڑھانے اور میر جاوہ و ریمدان سرحدی ٹرمینلز کی توسیع پر بھی اتفاق کیا۔

ایرانی عہدیدار نے واضح کیا کہ 22 ویں اقتصادی تعاون معاہدے کے تحت ایران اور پاکستان نے سالانہ دس ارب ڈالر کے تجارتی حجم کا ہدف مقرر کیا ہے، جس کے لیے روزانہ 1,800 سے 2,000 ٹرک سرحدی راستوں سے گزرنے ہوں گے۔ اس مقصد کے حصول کے لیے سرحدی انفراسٹرکچر میں بنیادی تبدیلیاں ناگزیر ہیں۔

مزید برآں، ایران اور پاکستان کے درمیان فری ٹریڈ ایگریمنٹ کے بیشتر پہلو مکمل ہو چکے ہیں۔ دونوں ممالک نے معاہدے کے تحت کسٹمز ٹیرف سے مستثنیٰ اشیاء کے ضمیموں کا جلد جائزہ لینے اور حتمی شکل دینے پر بھی اتفاق کیا ہے تاکہ مشترکہ اقتصادی کمیشن کے 23 ویں اجلاس سے پہلے آزاد تجارتی نظام کی راہ ہموار ہو سکے۔