الخلیل میں اسرائیلی فوج کے حملے میں درجنوں فلسطینی زخمی

شیعیت نیوز: بدھ کے روز مقبوضہ مغربی کنارے کے جنوبی شہر الخلیل میں واقع العروب مہاجر کیمپ میں قابض اسرائیلی فوج کے ساتھ جھڑپوں کے دوران زہریلی اور آنسو گیس کے استعمال سے درجنوں فلسطینی زخمی ہوگئے۔

العروب پناہ گزین کیمپ کی ہنگامی کمیٹی کے سربراہ عبدل حی جوابرا نے بتایا کہ اسرائیلی فوج نے کیمپ پر دھاوا بول دیا اور اس کے اندر فوجی رکاوٹیں کھڑی کیں جس سے لڑکوں اور اسرائیلی فوج کے درمیان تصادم ہوا۔ قابض اسرائیلی فوجیوں نے فلسطینیوں پراشک آور گیس کی شیلنگ کی جس کے باعث درجنوں فلسطینی دم گھٹنے سے بے ہوش ہوگئے۔

جوابرہ نے مزید کہا کہ اسرائیلی فوج نے گذشتہ رات کیمپ کے داخلی راستے پر واقع فوجی ٹاور پر آنسو گیس کے گولے داغنے کے لیے ایک پلیٹ فارم نصب کیا اور آج ان جھڑپوں کے دوران بڑے پیمانے پر گیس فائر کرنا شروع کر دی۔ جس سے یہ واضح ہوتا ہے کہ اسرائیلی فوج نے کیمپ کے اندر چوکیاں تعمیر کی ہیں۔

یہ بھی پڑھیں : صیہونی فوجی افسران کا حماس کے ساتھ جلد جنگی قیدیوں کے تبادلے پر زور

دوسری جانب بدھ کو درجنوں یہودی آباد کاروں نے اسرائیلی پولیس کی فول پروف سیکیورٹی میں مسجد قصیٰ میں گھس کر مسلمانوں کے قبلہ اول کی بے حرمتی کی۔

فلسطینی محکمہ اوقاف کی طرف سے جاری ایک بیان میں کہا گیا ہےکہ بدھ کو پولیس کی فول پروف سیکیورٹی میں درجنوں یہودی آباد کاروں، اسرائیلی طلبا اور انٹیلی جنس اہلکاروں سمیت دیگرانتہا پسندوں نے  قبلہ اول میں گھس کراشتعال انگیز چکر لگائے۔

یہودی آباد کاروں کے یہ دھاوے انتہا پسند گروپوں کی اپیل پر کیے گئے جنہوں نے منگل کو یہودیوں کے مذہبی تہوار’عید الانوار‘ کے موقے پر مسجد اقصیٰ میں جمع ہو کر تلموی تعلیمات کے مطابق مذہبی رسومات کی ادائی کی اپیل کی تھی۔

یہودی آباد کار مراکشی دروازے کے راستے مسجد اقصیٰ کے صحن میں داخل ہوئے۔

خیال رہے کہ جمعہ اور ہفتہ کے کے دن کے علاوہ ہفتے کے باقی ایام میں یہودی آباد کار دن میں دو بار مسجد اقصیٰ پر دھاوے بولتے اور تلمودی تعلیمات کے مطابق مسجد اقصیٰ کی حرمت کو پامال کرنے والے اشتعال انگیز اقدامات اور حرکات کرتے ہیں۔

یہودی آباد کاروں کو قبلہ اول پر دھاووں کے لیے فول پروف سیکیورٹی فراہم کی جاتی ہے جب کہ فلسطینیوں کو قبلہ اول میں نماز کی ادائیگی سے روکنے کے لیے طاقت کے استعمال سمیت طرح طرح کے حربے استعمال کیے جاتے ہیں۔