حضرت عیسیٰ مسیح علیہ السلام کی ولادت مبارک ہو، آیت اللہ علی خامنہ ای

شیعیت نیوز: رہبر انقلاب اسلامی حضرت آیت اللہ العظمیٰ سید علی خامنہ ای نے حضرت عیسیٰ مسیح علیہ السلام کی ولادت کی مبارکباد دی ہے۔

رہبر انقلاب اسلامی حضرت آیت اللہ العظمیٰ سید علی خامنہ ای نے انگریزی زبان میں اپنے ایک ٹوئیٹر پیغام میں حضرت عیسیٰ مسیح (ع) کی ولادت با سعادت کی مسلمانوں اور ایرانی اور غیر ایرانی عیسائیوں کو مبارکباد پیش کی ہے۔

ایران میں مقیم عیسائی برادری کے لوگ پوری آزادی کے ساتھ جشن منا رہے ہیں تاہم اس سال کورونا وائرس کی وبا کے وجہ سے کچھ طبی محدویت ہے۔

یہ بھی پڑھیں : شہید جنرل سلیمانی نے امریکی منصوبے کو پوری طرح ناکام بنایا، نوری المالکی

ہر سال رہبر انقلاب اسلامی عیسائی برادری کے گھر تشریف لے جاتے ہیں اور ان کو مبارکباد پیش کرتے ہیں تاہم اس سال کورونا کی وجہ سے یہ پروگرام نہیں ہو سکا اور رہبر انقلاب اسلامی کے دفتر کی جانب سے ایک ٹوئٹ کے ذریعے عیسائی بھائیوں کو مبارکباد پیش کی گئی ہے۔

دوسری جانب ایران کے صدر حسن روحانی نے عالمی سربراہوں کے نام الگ الگ پیغامات میں ان کو نئے عیسوی سال کی آمد اور حضرت عیسیٰ مسیح (ع) کے یوم پیدائش پر مبارکباد دی۔

انہوں نے اس بات پر زور دیا کہ وہ علاقائی اور عالمی تعاون سے دنیا میں درپیش چیلنجز بشمول کورونا وبا پر جلد از جلد قابو پا سکیں گے۔

حسن روحانی نے ان پیغامات میں مزید کہا کہ آج کی دنیا کو سیاسی، ثقافتی، معاشرتی اور معاشی بحرانوں کا سامنا ہے لہذا ممالک کے سربراہوں کو باہمی تعاون سے ان بحرانوں سے نکلنے اور کورونا وبا پر قابو پانے کیلئے کسی کوشش سے دریغ نہیں کرنی ہوگی۔

انہوں نے کہا کہ حضرت عیسیٰ (ع) امن اور دوستی کے علمبردار تھے اور ہمیں امید ہے کہ بنی نوع انسان الہامی ادیان کی تعلیمات پر عمل پیرا ہونے سے انسانی فضیلت اور کمال کی راہ پر گامزن ہوجائے گا۔

ایران کی پارلیمنٹ کے اسپیکر محمد باقر قالیباف اور وزیر خارجہ محمد جواد ظریف نے بھی اپنے الگ الگ پیغامات میں عیسائی برادری کو نئے عیسوی سال 2021 کی آمد پر مبارکباد دیتے ہوئے کہا کہ بلاشبہ حضرت عیسیٰ (ع) کی تعلیمات پرعمل پیرا ہونے سے پوری انسانیت کیلئے امن، انصاف اور کامیابی کے حصول کی فراہمی ہوگی۔