ملک بھر میں کالعدم تنظیموں کے مدارس اور فلاحی اداروں کے خلاف کریک ڈاؤن جاری

شیعیت نیوز: نیشنل ایکشن پلان کے تحت ملک بھر میں کالعدم تنظیموں کے خلاف کارروائیاں جاری ہیں، پنجاب اور سندھ میں آج مزید درجنوں مدارس کو حکومتی تحویل میں لے لیا گیا ہے، نیشنل ایکشن پلان کے تحت سندھ حکومت نے صوبے میں دینی مدارس کو خود چلانے کے فیصلے پر عملدرآمد شروع کردیا ہے جس کے تحت کالعدم تنظیموں کے 56 مدارس، مراکزِ صحت سمیت دیگر املاک کو سندھ حکومت کے کنٹرول میں لیا جا رہا ہے، مدرسہ جامعہ الدرسات الاسلامیہ کو سندھ حکومت نے اپنی تحویل میں لے لیا ہے۔سوال یہ پیدا ہوتا ہے کہ کیا ان مدرسوں اور اداروں کو جن کو قومی تحویل میں لیا گیا ہے ان کے منتظمین کو بھی برطرف کیا جائے گا اور تکفیری مائنڈسیٹ کے خاتمے کے کیلیے عملی اقدامات بھی کیے جائیں گے یا پھر ان ہی تکفیری ذہنیت کے حامل افراد کو ان اداروں میں اہم ذمہ داریوں پر رہنے دیا جائے گا۔

دوسری جانب ذرائع وزارت داخلہ کے مطابق مرید کے میں کالعدم تنظیم جماعت الدعوۃ اور فلاح انسانیت کے 8 مدارس کو تحویل میں لیا گیا جبکہ کالعدم جماعتوں کی ڈسپنسریاں ایمبولینس اور نرسنگ کالج کو بھی تحويل میں لے لیا گیا ہے۔ وزارت داخلہ کی جانب سے جاری بیان میں کہا گیا ہے کہ نیشنل ایکشن پلان کے تحت 121 افراد کو حفاظتی تحویل میں لیا گیا، صوبوں میں 182 مدارس، 34 اسکولز، 5 کالج، 163 اسپتال، 184 ایمبولنس اور 8 دفاتر تحویل میں لے گئے، کالعدم تنظیموں کے خلاف آپریشن جاری رہے گا جب کہ صوبوں کے ساتھ وزارت داخلہ مل کر کام کر رہی ہے۔ واضح رہے کہ گزشتہ روز وفاقی حکومت کے حکم پر کالعدم تنظیموں کے خلاف کریک ڈاؤن کے نتیجے میں اسلام آباد اور راولپنڈی میں کالعدم تنظیموں کے مساجد، مدارس اور اسپتالوں کو سرکاری تحویل میں لیا گیا تھا۔