مجلس وحدت مسلمین کراچی نے کے الیکٹرک کے خلاف مہم کا آغاز کردیا

شیعیت نیوز: مجلس وحدت مسلمین کراچی کے رہنما علامہ مبشر حسن کا کہنا ہے کہ اکیس ارب میں فروخت کی جانے والی کے الیکٹرک اب ساتھ ہزار پانچ سو ارب روپے منافع کما چکی ہے، آخر کیوں معاشی حب کراچی کی ایک کروڑ سے زائد صافین عوام کو پورے ملک میں سب سے زیادہ مہنگی فی یونٹ قیمت پر بجلی دی جارہی ہے، 85 فیصد سے زائد ریکوری والے علاقوں میں آخر کیوں اعلانیہ و غیر اعلانیہ بلا جواز لوڈشیڈنگ کی جارہی ہے، کے الیکٹرک اوور بلنگ کے نام پر اربوں روپے سے بھتہ وصول کر چکی ہے، گزشتہ 9 سالوں سے کے الیکٹرک کا آڈٹ نہیں ہوا، کے الیکٹرک کی انتظامیہ تانبا چوری، اوور بلنگ، میٹر ٹیمپرنگ سمیت دیگر طریقوں سے شہر کی عوام کو لوٹ رہی ہے، وفاقی و صوبائی حکومتیں جواب دیں کہ ایک نجی پرائیویٹ کمپنی کو سرکاری پولیس اسٹیشن کیوں اور کس بنیاد پر دیا گیا ہے، عوام کو بجلی کے بلوں پر دھمکیاں لکھنا پولیس اہلکاروں کے ذریعہ ہراساں کرنے کا سلسلہ بند کیا جائے، کے الیکٹرک سندھ حکومت سے سستی بجلی کیوں نہیں خریدتی، گیس سے بجلی تیار کرنے والی بددیانت کے الیکٹرک انتظامیہ عوام کو لوٹنے کا سلسلہ بند کرے، کے الیکٹرک کی نجکاری شہر قائد کی عوام کے ساتھ زیادتی ہے جس کی پر زور مذمت کرتے ہیں۔

ان خیالات کا اظہار انہوں نے وحدت ہاوس کراچی میں جاری رہنماوں کے ہمراہ نیوز کانفرنس سے خطاب میں کیا۔ پاس موقع پر مجلس وحدت مسلمین کراچی ڈویژن کے رہنما احسن عباس رضوی، عارف رضا زیدی، علامہ علی انور جعفری، ناصر حسینی، میر تقی ظفر، عون علی، ثمرزیدی، علی عباس زیدی سمیت دیگر رہنما موجود تھے۔ علامہ مبشر حسن کا کہنا تھا کہ پاکستان کی تاریخ میں آج تک کسی کمپنی نے ایک وقت میں ساڑھے پانچ ہزار ملازمین کو جبری طور پر نہیں نکالا، کے الیکٹرک انتظامیہ کی جانب سے نکالے جانے والے ساڑھے پانچ ہراز ملازمین کے ساتھ ہیں، شہر کی عوام کو مزید معاشی بدحالی اور بے روزگای کی طرف دھکیلا جارہا ہے، انتظامیہ کے اس ظالمانہ اقدام کی مذمت کرتے ہیں، ہم صدر مملکت، وزیر اعظم پاکستان، صوبائی وزیراعلی سمیت چیف جسٹس آف پاکستان جسٹس ثاقب نثار، آرمی چیف جنرل قمر جاوید باجوہ سے مطالبہ کرتے ہیں کہ کے الیکٹرک کو فوری قومی تحویل میں لیا جائے۔

علامہ مبشر حسن کا کہنا تھا کہ قومی احتساب ادارے نیب کے ذریعہ ادارے میں موجود کرپٹ انتظامیہ کے خلاف فوری کاروائی کرے، گزشتہ 9 سالوں سے کے الیکٹرک کا آڈٹ نہیں ہوا فوری آڈٹ کیا جائے اور ادارے میں موجود کرپٹ آفسران کے خلاف کاروائی کی جائے، کے الیکٹرک گیس کمپنی کے اربوں روپے کے واجبات ادا کرے، اوور بلنگ کے نام پر مزید بھتہ خوری بند کی جائے، شہر قائد کو بلاتعطل بجلی فراہم کی جائے، اس حوالے سے مجلس وحدت مسلمین نے کے الیکٹرک کے خلاف مرحلہ وار مہم کا آغاز کردیا ہے اور پہلے مرحلہ کے الیکٹرک کے خلاف عوام کی آگاہی کیلئے تشہیری مہم کے حوالے سے شہر میں بینرز آویزاں کردیئے گئے ہیں، دوسرے مرحلہ شہر قائد کے مختلف اضلاع میں کے الیکٹرک انتظامیہ کے خلاف احتجاج کیا جائے کا اور شہر بھر میں بے جا اور بلاوجہ لوڈشیڈنگ اور اوور بلنگ سمیت دیگر شکایات کے حوالے سے احتجاجی کیمپ لگائے جائیں گے، جس میں عوام اپنی شکایات درج کروا سکیں گے، شہر کی عوام کو ظالمانہ اقدامات پر قانونی تحفظ فراہم کرنے کیلئے عدلیہ میں بھی جایا جائے گا۔