راولپنڈی سے گلگت جانے والی بس پر ہری پور کے مقام پر شرپسندوں کا پتھراو، مسافر پریشان

شیعیت نیوز : راولپنڈی سے گلگت جانے والی نجی کمپنی نیٹکو کی بس پر نامعلوم افراد نے ہری پور کے مقام پر اچانک پتھراو کر دیا جس کے باعث بس کے شیشے ٹوٹ گئے، ابتدائی معلومات کے مطابق، مغرب کے بعد جیسے ہی نیٹکو کی گاڑی ہری پور کے مقام پر پہنچی تو کچھ شرپسندوں نے اچانک ہی بس پر پتھراو کر دیا جس کے باعث بس کے شیشے ٹوٹ گئے۔ یاد رہے کہ گذشتہ روز ہری پور میں ہی معروف شیعہ رہنما و ڈپٹی ڈائریکٹر بیت المال ہری پور نیئر عباس جعفری قاتلانہ حملہ کیا گیا تھا جس میں وہ شدید زخمی ہوگئے تھے۔ نیئر عباس جعفری کا شمار ضلع ہری پور کے سرگرم رہنماوں میں ہوتا ہے، ان کی اہلیہ مجلس وحدت مسلمین خیبرپختونخوا کی سیکرٹری جنرل ہیں۔ ہری پور میں دو دنوں میں دو مختلف واقعات نے کئی سوالات کھڑے کردئیے ہیں۔ ایسا محسوس ہوتا ہے کہ دہشتگردوں کو کھلا چھوڑ دیا گیا ہے یا پھر انتظامیہ ان کے آگے بےبس ہو چکی ہے۔ خیال رہے کہ کالعدم جماعتوں کی سرگرمیوں پر پہلے ہی بہت سارے سوالات اٹھائے جا رہے ہیں اور اسے نیشنل ایکشن پلان کی ناکامی سے تعبیر کیا جا رہا ہے۔