بحرین میں بامعنی مذاکرات پر تاکید، دکھاوے کے انتخابات کا بائکاٹ

بحرین میں جمعیت الوفاق کے سکریٹری نے ملک میں ہونے والے انتخابات کو بے اعتبار قراردیا ہے۔ لولوء ٹی وی کی رپورٹ کے مطابق شیخ علی سلمان نے سیاسی اصلاحات کی غرض سے حکومت اور مخالف پارٹیوں کے درمیاں بامعنی مذاکرات پر تاکید کرتے ہوئے کہا کہ دکھاوے کے انتخابات ہرگز کوئي راہ حل نہیں ہے کیونکہ یہ انتخابات خود بحران کا ایک حصہ ہیں اور ان کا کوئي اعتبار نہیں ہے۔ شیخ علی سلمان نے کہاکہ بحرین کا بحران دراصل گفتگو سے ہی حل ہوگا لیکن آل خلیفہ کی حکومت تشدد آمیز پالیسیوں اور بیرونی افواج کی مدد، غیر ملکی ایجنٹوں کے سیاسی ہتھکنڈوں کے سہارے اپنی بات منوانا چاہتی ہے۔ انہوں نے کہاکہ اس طرح ملک میں امن و استحکام نہیں آسکتا۔ دریں اثنا بحرین کے ایک عالم دین سید عبداللہ الغریفی نے کہا کہ ملک کا بحران آل خلیفہ کی غلط پالیسیوں کی وجہ سے ہے اور انتخابات سے یہ بحران مزید پیچیدہ ہوجائے گا۔ بحرین میں بائيس نومبر کو پارلیمانی انتخابات ہونے والے ہیں۔ ملت بحرین اپنے پامال شدہ حقوق کی بازیابی اور آل خلیفہ کی جاہلانہ امتیازی پالیسیوں کے خلاف احتجاج کررہی ہے۔