اب سارے پاکستان میں مظاہرے ہونگے، ظلم اور بربریت سے دھرنا ختم نہیں ہوگا
شیعت نیوز (اسلام آباد)پاکستان تحریک انصاف کے سربراہ عمران خان نے کہا ہے کہ وہ وزیراعظم ہاوس کے باہر احتجاج کئے بغیر واپس نہیں جائیں گے۔ جب کہ پاکستان عوامی تحریک کے سربراہ علامہ طاہر القادری نے کہا ہے کہ پرامن مظاہرے کو تشدد میں بدل دیا گیا ہے، ان کے ظلم اور بربریت سے دھرنا ختم نہیں ہوگا۔ ایک نجی ٹی وی سے خصوصی گفتگو کرتے ہوئے عمران خان نے کہا کہ نواز شریف کو تو اپنی دولت کی فکر ہے، اس کو جمہوریت کی کوئی پروا نہیں۔ حکومت نے بھاری شیلنگ کی ہے اور میرے کنٹینر کے قریب بھی شیل پھینکے گئے ہیں۔ دنیا کے دیگر ملکوں میں اگر کسی حکمران پر الزام ہو تو استعفٰی دے دیتا ہے۔ لیکن یہ ڈیمو کریٹ نہیں ہے بلکہ وہ صرف اپنی دولت بچانا چاہتے ہیں۔ ہم پرائم منسٹر ہاوس کے سامنے احتجاج کئے بغیر نہیں جائیں گے۔ عمران خان نے کہا کہ میں جاننا چاہتا ہوں کہ چوہدری نثار کس طرح جنرل بن کر احکامات دے رہا ہے۔ انہوں نے اس قدر ہیوی شیلنگ کی ہے۔ اب سارے پاکستان میں مظاہرے ہوں گے، لوگ نکلنا شروع ہوگئے ہیں۔
علامہ طاہر القادری نے اپنی گفتگو میں کہا ہے کہ اس پرامن دھرنے کے شرکاء کو تشدد میں کس نے بدلا ہے۔ برطانیہ سمیت دیگر ممالک میں بھی وزیراعظم ہاوس کے سامنے احتجاج ہوتا ہے اور ہم نے یقین بھی دلایا کہ ہم پرامن احتجاج کریں گے، لیکن انہوں نے گولیاں چلا دیں۔ ان کے ظلم اور بربریت سے یہ دھرنا ختم نہیں ہوگا، اور پرائم منسٹر ہاوس کے سامنے احتجاج ضرور ہوگا۔ قادری نے کہا کہ مارچ آگے جا رہا ہے، اور مارچ کامیاب ہوگا۔ ہم پرامن ہیں اور پرامن رہیں گے اور ہمارا قافلہ چلتا رہے گا۔ مجھے پتہ چلا ہے کہ مجھے گرفتار کرنے کا پروگرام بنا لیا ہے لیکن ان کے عزائم پورے نہیں ہوں گے۔ دھرنا جاری رہے گا اور ظلم و بربریت کا خاتمہ ہوگا۔ دنیا نے دیکھ لیا ہے کہ وزیر داخلہ چوہدری نثار نے خود گولیوں چلوائی ہیں۔
