غلط پالیسیاں، مسلم ممالک میں اختلافات کی وجہ: شیخ احمد قبلان
لبنان کے عالم دین شیخ احمد قبلان نے عرب اور اسلامی دنیا میں غلط پالیسیوں کے نتیجے میں پیدا ہونے والے اختلافات کے بارے میں خبردار کیا ہے۔ لبنان کے ٹی وی چینل المنار کی رپورٹ کے مطابق شیخ احمد قبلان نے بدھ کے دن کہا کہ عرب دنیا خصوصا عراق اور غزہ پٹی کی سیکیورٹی صورتحال سے صیہونی حکومت اور تکفیری دہشتگرد گروہ داعش کے قریبی تعاون کی نشاندہی ہوتی ہے۔ شیخ قبلان نے مزید کہا کہ اگر بعض عرب اور مسلم رہنماؤں نے اپنی شرمناک پالیسیاں جاری رکھیں تو مسلمانوں کے اختلافات مزید گہرے ہوجائيں گے۔ شیخ قبلان نے غزہ پٹی کے فلسطینی باشندوں پر صیہونی حکومت کے مظالم کی مذمت کرتے ہوئے ان مظالم کو انسانیت پر حملے قرار دیا اور کہاکہ اسرائیل ان حملوں کے ذریعے عالمی رائے عامہ کی حیثیت ختم کرنا چاہتا ہے۔ شیخ قبلان نے مزید کہا کہ لبنان میں صدر کے فوری انتخاب کے ذریعے تمام گروہوں اور جماعتوں کے درمیان اتفاق رائے کے لۓ مناسب سیاسی ماحول پیدا کیا جانا چاہۓ۔
