بحرین میں مسجد پر سیکیورٹی فورسیز کا حملہ
بحرین کی سکورٹی فورسیز نے مخالفین کی سرکوبی جاری رکھتے ہوئے دارالحکومت منامہ کے قریب ایک گاؤں میں شیعہ مسلمانوں کی ایک مسجد پر حملہ کردیا ہے۔ پریس ٹی وی کے مطابق بحرینی فوجیوں نے اس مسجد میں ایک جلوس جنازہ کے لئے جمع ہونے والے افراد پر آنسو گیس پھینکی اور ان پر حملہ کیا۔ رپورٹ کے مطابق یہ واضح نہیں ہوا کہ اس مسجد پر آل خلیفہ کے فوجیوں نے کس وجہ سے حملہ کیا۔ بحرین کی جمعیت الوفاق نے ایک بیان میں حکومت بحرین کے اس اقدام کی مذمت کی ہے۔ آل خلیفہ کے فوجیوں نے فروری ميں بھی منامہ کے قریب ایک گاؤں میں مسجد پر حملہ کیا تھا جبکہ بحرین میں 2011 سے شروع ہونے والی انقلابی تحریک کے بعد سے آل خلیفہ حکومت کی جانب سے اب تک دسیوں مسجدیں شہید کی جاچکی ہيں۔ دوسری جانب بحرین ميں جاری کی جانے والی ایک تصویری فلم میں آل خلیفہ کی سیکورٹی فورسیز کو عزاداروں پر زہریلی گیس کا استعمال کرتے ہوئے دکھایا گیا ہے۔ بحرین کی جمعیت الوفاق نے کہا ہے کہ آل خلیفہ کی فورسیز نے ایک ماہ سے کم عرصے ميں یہ دوسری بار عزاداروں پر زہریلی گیس کے گولے پھینکے ہيں۔ جمعیت الوفاق نے کہا ہے کہ حکومت بحرین مقدسات اور انسانوں کی آزادی کے احترام کی قائل نہیں ہے اور لوگوں کا چین و سکون چھین لیا ہے اور وہ کسی بھی دینی، انسانی اور اخلاقی اصول کی پابند نہیں ہے۔