شام پر حملہ کیا تو عراق میں امریکہ اڈوں کو نشانہ بنائیں گے المختار فورس
عراق کی المختار فورس کے سربراہ نےکہا ہے کہ مغرب اور امریکہ کی جانب سے شام پر کسی بھی قسم کے حملوں کی صورت میں ہم عراق میں امریکی مفادات اور اس کے اڈوں کو نشانہ بنائیں گے۔ انہوں نے کہا کہ المختار فورس شام کی سرزمین پر امریکی اور مغربی جارحیت کا مقابلہ کرنے اور شامی عوام کے دفاع کی خاطر لڑنے کو تیار ہیں۔ ان کا کہنا تھا کہ امریکی اور مغربی فوجوں نے اگر شام کی سرزمین پر حملہ کیا تو یہ حملہ بلا جواز ہو گا، جس کے لئے وہ جھوٹے ثبوت پیش کر رہے ہیں اور جھوٹی خبروں کو بہانہ بنا رہے ہیں اور اس بارے میں سب کو معلوم ہے کہ شام کو اس کے نا کردہ گناہوں کی سزا دینے کی کوششیں کی جا رہی ہیں۔ المختار فورس کے سربراہ واثق البطاط نے المختار فورس کی صلاحیتوں کے بارے میں بات کرتے ہوئے کہا کہ المختار فورس نے اعلیٰ سطح کی ٹریننگ حاصل کی ہوئی ہے اور وہ ہر طرح کے حملوں کا منہ توڑ جواب دینے کی صلاحیت رکھتی ہے۔