پانچ جمع ایک گروپ دوسروں کے دباؤ میں نہ آئے

اسلامی جمہوریہ ایران کے صدر نے کہا ہے پانچ جمع ایک گروپ کے ممالک کو چاہئے کہ وہ خود کو صہیونیوں اور بعض سامراجی طاقتوں کا اسیر نہ بنائيں ۔صدر  احمدی نژاد نے آج ایران کے شمالی صوبہ گیلان کے صدر مقام رشت میں ایک بڑے عوامی اجتماع سے خطاب کے دوران اس بات پر زور دیتے ہوئے کہ مذاکرات، احترام اور انصاف کی بنیادوں پر ہونے چاہئیں کہاکہ پانچ جمع ایک گروپ کے ساتھ ایران کے مذاکرات سبھی قوموں کے قانونی  حقوق اور ساتھ ہی ملت ایران کے حق کو تسلیم کئے جانے پر منتج ہونے چاہئيں۔

صدر مملکت جناب احمدی نژاد نے پانچ جمع ایک گروپ کے ساتھ ایران کے گذشتہ ادوار کے مذاکرات کی طرف اشارہ کرتے ہوئے کہا کہ اگر مقابل فریق انصاف قانون اور احترام کے اصول کی پاسداری کرے تو آئندہ کے مذاکرات میں کسی نتیجے کی توقع کی جاسکے گی ۔

اسلامی جمہوریہ ایران کے صدر نے اس بات کا ذکر کرتے ہوئے کہ صہیونی لابی ، بعض استکباری قوتیں  اور یورپ میں کچھ تسلط پسند حکومتيں نہيں چاہتيں کہ مسائل خوش اسلوبی سے حل ہوں پانچ جمع ایک گروپ کے ملکوں کو نصیحت کی کہ وہ ان قوتوں کے دباؤ میں نہ آئيں ۔ انھوں نے کہا کہ ایرانی عوام منطق انصاف اور احترام و محبت پر یقین رکھتے ہيں اور دنیا کو یہ جان لینا چاہئے کہ ایران کے عوام منہ زور طاقتوں کی منہ زوریوں کے مقابلے میں پوری قوت کے ساتھ ڈٹے ہوئے ہيں ۔