24 گھنٹوں میں یمن پر 104 سعودی فضائی و میزائل حملے، یحییٰ سریع

شیعیت نیوز : یمنی مسلح افواج کے ترجمان بریگیڈیئر جنرل یحییٰ سریع نے اعلان کیا ہے کہ سعودی جنگی طیاروں اور میزائل یونٹس نے گزشتہ 24 گھنٹوں میں یمن پر 104 فضائی اور میزائل حملے کیے، جن میں دارالحکومت صنعاء اور الجوف، البیضاء، صعدہ، عمران، مارب، تعز اور لحج کے صوبوں میں شہری مقامات کو نشانہ بنایا گیا۔

بدھ کی شام جاری بیان میں یحییٰ سریع نے بتایا کہ فضائی حملے خمیس مشیط اور طائف کے فضائی اڈوں سے اڑنے والے ایف 15 اور ٹائفون طیاروں نے کیے، جبکہ میزائل نجران اور جیزان سے داغے گئے۔ ان حملوں میں درجنوں افراد شہید اور زخمی ہوئے جن میں زیادہ تر خواتین اور بچے ہیں، اور سعودی جارحیت کی حالیہ لہر میں یمن پر حملوں کی مجموعی تعداد 4136 تک پہنچ گئی ہے۔

یہ بھی پڑھیں : تعز اور صعدہ پر سعودی بمباری، فیکٹری کے 3 مزدوروں سمیت 8 شہری شہید

تعز کے ضلع مقبنہ کے علاقے البرح میں رات کے وقت شیخ منصور حائل سنان کے گھر پر سعودی فضائی حملے میں دو بچوں سمیت 7 افراد شہید اور چار بچوں سمیت 6 زخمی ہو گئے، جبکہ تعز ہی میں دو خاندانوں کے گھروں پر حملوں میں خواتین اور بچے ملبے تلے دب گئے جنہیں مقامی لوگوں نے مزید حملوں کے خطرے کے باوجود نکالا۔

ضلع ماویہ کے گاؤں المعیتیب میں رہائشی گھروں پر حملے میں ایک مرد اور ایک خاتون زخمی ہوئے اور شہریوں کی گاڑیاں جل گئیں۔ الصلو اور حیفان کے اضلاع میں سعودی طیاروں نے دو طبی مراکز، النور اور الشرف مساجد اور ایک عوامی سڑک کو بھی نشانہ بنایا، جس پر مقامی لوگوں نے شہری تنصیبات پر مسلسل حملوں اور عالمی خاموشی کی شدید مذمت کی۔